Nongpoh, Jymmang 30: Ka jingshlei um kaba la ktah na ka jingther u lapbah mynta ka sngi, ka la long shisha ka jingsngewsynei bad ka jingsngew sangsot ia ka skul St. Jude Secondary School, Umpher ban iohi ba ka la shah tap ha ka jingshlei um bad ka jingshahktah ki kyntup ia ka Hostel, ki jaka sah jong ki Brother bad ruh ka ïingmane.
Ka jingkylli ka mih, hato mano ban iarap ia katei ka skul pule, namar kane ka jingshlei um ka la ktah jur shisha ha kaba man ba wan u lapbah ki hap ban mad ia ka jingshlei um bad iano ruh yn kynnoh la ka dei ka jingbym biang ki Nala um ka surok 4-lane ne ka dei ka jingtih khyndew na ki thain Killing.
Kumba la sakhi mynta ka sngi, la iohi ba ka um ka la tap ia ka skul, ka Hostel, ka ingmane, ka phyllaw jong ka skul, ha kaba ym long shuh ban pynlong skul, ban shong ban sah, kane ka la wan rah shisha ka jingjynjar kaba khraw ia ki bor pyniaid katei ka skul.
Kumba la sakhi ruh ka um ka la pynjot lut ia ki kamra klas, ki jaka sah, ki jaka bam ha kaba ka la wan rah ka jingduhnong kaba khraw da ki phew lak tyngka bad kyrpang na ka bynta kane ka skul bad ki jaka sah ki brother bad ki samla pule la donkam ban ioh ka jingiarap kyrpang na ka sorkar. kumba ha kine ki sngi u MLA ka Jirang u Bah Sosthenes sohtun bad u Deputy Commissioner ka Ri Bhoi, u Abhilash Baranwal ryngkat na ka NHAI ki la kular ban weng ia kane ka jingeh bad kam dei pat ka kam kaba suk ba ka jingther u lapbah ka dang bteng ha kane ka aiom slap.
