Nongpoh, Jymmang 30: Ka jinglah ban plie paidbah noh mynta ka sngi ia ka Health Sub Centre ha ka Shnong Umktieh ba hap ha Umroi Constituency kan sa long ka jingmyntoi kaba khraw ia ki 7 tylli ki shnong ban ioh ia ka jingsumar ha ka pang ka shitom, namar na ka liang u MLA ka Umroi Constituency, u Bah Damanbait Lamare kum u kongsan u la plie paidbah noh mynta ka sngi.
Ha ka jingplie ia kane ka Health Sub Centre la don ryngkat ruh u Deputy Commissioner ka Ri Bhoi, u Abhilash Baranwal, ka Dr. A. Kharduid, District Medical & Health Officer ka Ri Bhoi, u Bah Dius Jyrwa, Chairman ka Dorbar Shnong Umktieh Pyllun, ki rangbah shnong, ki nongtrei na ka tnad ka koit ka khiah bad ki paidbah nongshong shnong ka thain Umktieh.
Kitei ki 7 tylli ki shnong ki ban sa ioh jingmyntoi na kane ka Health Sub Centre ki kynthup ia ka Shnong Umktieh Nongshilliang, Umktieh Pdeng, Umktieh Mawkhim, Umktieh Lawsaitsniang, Umsawriang, Nonglum bad ka shnong Umtangling.
Ïa kane ka Heath Sub Centre, la tei ha ka jinglut kaba la kot sha ka T. 55 lak tam, ïa kaba la shna bad pynwandur bha da ka Umktieh VHC.
Haba ai jingkren ha kane ka sngi, u Damanbait Lamare u la buh kata ka jingkyrpad ia ki nongtrei ka tnad ka koit ka khiah ba kin shim ia kata ka jingkitkhklieh ha ka ban ai jingsumar kaba paka ia kiba pang ba shitom bad ym kwah satia ban mih kino kino ki jingkyntoh ne ki jingshah kynnoh ba leh torti ha ba wan ai jingsumar ki paidbah, namar ka jingdon kane ka Health Sub Centre ka dei ban ai jingmyntoi ia ki paidbah ha ka pang ka shitom.
Shuh shuh, ha kawei ka bynta, u la kypad ruh naduh ki nongialam shnong, ki paidbah bad ki nongtrei ka tnad ka koit ka khiah ba kin don kata ka mynseim jong ka jingiatrei lang na ka bytna ban ri ban sumar bha ia kane ka jaka ai jingsumar, namar ka jingdon kane ka jaka ai jingsumar ka dei ka thong jong ka sorkar ban pynsuk ia ki paidbah nongkyndong ban ioh ia ka jingsumar ha ka pang ka shitom, u la bynrap.
