KYRPAD RUH NA U MYNTRI RANGBAH BAN WENG IA BUN KI JINGEH KI SAMLA PULE HA RILUM GARO
Tura, Jymmang 30: Ka Federation of Khasi Jaintia and Garo People, Garo Hills Zone mynta ka sngi ka la pynher da ka dorkhas sha u Myntri Rangbah ka jylla, u Conrad K. Sangma lyngba u Deputy Commissioner ka West Garo Hills na ka bynta ban pynsngew halor shibun ki mat ki jura kiba ia dei bad ka pule ka puthi bad ka jingeh jong ki samla pule ha Rilum Garo.
Katkum ka dorkhas ba la phah da u President ka FKJGP, Garo Hills Zone u Pritam Arengh bad u General Secretary, u Matsrang A. Sangma lyngba u Deputy Commissioner ka West Garo Hills u Vibhor Agarwal sha u Myntri Rangbah ka jylla, u Conrad K. Sangma, ka thong kaba hakhmat eh ba ka seng ka la pynpaw ha katei ka dorkhas, ka dei ka jingduna ki samla ba ioh ban rung Class na ka bynta ka Class XI, kaba dei hadien ka jingpynbna ia ka result SSLC examination 2025 ba la pynbna ha ka 5 tarik u Jymmang 2025 da ka Meghalaya Board of School Education.
Ka seng ha katei ka dorkhas ka la pynpaw ruh hadien ba la pynbna ia ka result SSLC, ki don haduh 80% kiba la pass bha ha ka SSLC examination bad kane ka la buh jingeh ban ioh rung sha ki skul pule na ka bynta ka Class XI, namar baroh ki samla pule ki ia beh sha Tura ban ioh ia ka jingpule kaba kham biang bad namar baroh ki la iabeh sha Tura kane ka la buh jingeh ba bun ki samla pule ki hap ban sangeh ka jingpule na ka daw ka jingbym ioh ban rung Class ba la dap lut ki jaka pule ha ki skul ne kolej sorkar kiba don ha Tura.
Ka seng ka la pynpaw ruh katkum ka jingwad bniah, ki don haduh 300 ngut ki samla pule kiba ym pat ioh ban rung Class bad ruh haduh 200-300 la khmih lynti ba ki dang hap ban wad Class hadien ba la pynbna ia ka Supplementary Result kaba la pynbna ha ka 26 tarik u Jymmang 2025 bad lada khein lang kin poi sha ka 500 haduh 600 ki samla pule kiba dang donkam ban ioh rung Class.
Ban pynsuk ia ki samla pule ban ioh rung Class, ka seng ka la ai jingmut ruh ia ka sorkar ban ailad noh ia ki khynnah ban don ka skul ha ka por mynstep (Morning Shift) lane ka skul ban pule ha ka por janmiet (Evening Shift) ha ki skul sorkar ne ki kolej khnang ban ioh lad kitei ki samla ban bteng ia ka jingpule na ka daw ka jingbym ioh rung Class ba la bun palat ki samla kiba la pass ha ka SSLC examination.
Ha kawei ka bynta, ka seng ka la ai jingmut ruh sha ka sorkar ban iarap kyrpang noh ia ki samla pule da kaba pynduna ne map noh ia ki jinglut jingsep ba ki hap ban siew sha ki skul shimet lade ba ka dor jong ka bai skul kan ia ryngkat dor bad ka bai skul kiba ki ki siew kum ha ki Kolej sorkar, khnang ba kito ki samla pule ban na nongkyndong bad kiba duna ha ka ioh ka kot kin dang lah ban bteng ia ki jingpule sha ki kyrdan kiba shaneng.
Ka seng ka la pynpaw ruh halor ka jingdonkam ban pynshlur ban don kita ki jingpule kiba pyntbid ia ki samla pule ha kino kino ki kam ba kin hap ban trei (Trade Education), namar lada don kum kine ki jaka pule kane kan iarap ym tang ban pynduna ba kin ioh rung klas ha kiwei ki skul bad kan iarap ruh ban pynmih ia ki samla kiba la tbit ban trei ha kino kino ki kam ha ka thain Rilum Garo bad ha ka jylla hi baroh kawei.
Ha kawei pat ka bynta, ka seng ka la kyrpad ruh na ka sorkar ba kan pynsangeh shuwa ban pyntreikam ia ka National Education Policy ha ka jylla Meghalaya, namar kumba long haduh mynta ka jylla ka dang duna ha kiba bun ki liang naduh ki skul building, ki nongtrei bad kiwei kiwei ki jingduna kiba dei ban pynbiang ha kaba ia kane la pynpaw da ki paidbah babu balang na Rilum Garo.
Namarkata, ka seng FKJGP na Rilum Garo ka la kypad jur ruh ia u Myntri rangbah ka jylla ba un shim khia lem halor kitei ki phang ba la wan rah da ka seng bad kumba ka seng ka la pynpaw ia kiba bun ki jingeh ki samla pule ba la bsuh lang ruh ia ka kyrteng ki samla pule kiba ym pat ioh ban rung Klass bad ruh ia ki skul ne ki Kolej kiba don ha Rilum Garo, kiba dei na ka bynta ka jingbit jingbiang bad ruh ka thong ban dang kyntiew ia ka pule ka puthi ki samla ha Rilum Garo bad ha ka jylla hi baroh kawei.
