Ka khyrdop ILP ba dang shu shna da ka seng Khasi Student Union ha kine ki khyndiat sngi ha rud surok bah NH-6 haka shnong 20 mer Pahammawleiñ kala shah pynpra noh bad shah thang, bad naka liang ka seng kala kynnoh ba dei ki pulit kiba pynpra ïa katei ka khyrdop.
Kum ban shu pynpaw ba ka KSU kala pynïeng ïa katei ka khyrdop haka 6 tarik mynta u bnai ban pynlong ruh ka jingtalasi naphang ïaki kali jong ki briew kiba wan nakiwei kiwei ki jylla kum ka jingpyntreikam ïaka ILP hadien ka jingkuman jong ka sorkar ban ai ïaka ILP haka jylla bad ka jingdkoh ka sorkar jylla ban pyntreikam ïaka Meghalaya Residents Security and Safety Act (MRSSA) naka bynta ban teh lakam ïaka rung ka mih jong ki mynder.
Halor katei ka jingpynieng ïa katei ka khyrdop naka liang ka seng KSU ka don ruh ka jingthmu ban bteng biang ïa katei ka kam kum ban kyrsiew thiah ïaka sorkar pdeng ba ka dei ban shimkhia ban ai ïaka ILP bad kumjuh ruh ban pyntreikam ïaka MRSSA haka jylla.
Naka liang ka seng kala kynnoh ruh ba ki pulit ka Byrnihat kila pynpra noh ïa katei ka khyrdop hynne ka step.
