U MLA ka United Democratic Party (UDP) na Mookaiaw constituency u Bah Nujorki Sungoh hynne ka sngi u la kyntu ia ka Sorkar Jylla pynkloi ka jingmang tyngka ban shna ia ka surok na Madan Pohkseh sha Lakasein.
Haba wanrah iaka jingkylli hapoh ka iingdorbar u Bah Nujorki u la pyntip ba ong ba ka surok na Madan Pohkseh sha Lakasein ka long kaba kongsan bha ban kyntiew ia ka kamai ka kajih jong ki paidbah namar kan pyniasoh iaka East Jaintia Hills bad ka West Jaintia Hills.
“Nga kyrpad ia ka Sorkar Jylla ban sngewbha pynkloi noh ia ka jingmang tyngka ban shna iaka surok na Madan Pohkseh sha Lakasein ban iarap kyntiew ia ka ioh ka kot jong ki paidbah nong shong shnong na baroh 2 tylli ki District ka Rilum Jaintia Hills” la ong u Bah Nujorki.
Haba jubab halor kane naka liang u Symbud Myntri Rangbah ba khmih ia ka tnat PWD (Road), u Bah Prestone Tynsong ula pyntip ba ka jingsor jamin iaka surok ka dang iaid bad haka juh ka por ka jingïakren bad ki trai jaka ka dang iaid.
“Ka jingiakren ruh kala don bad ki trai jaka. Shisien ba ngi la iasngewthuh jingmut, ngin sa iasoi ia ka gift deed bad ngin sa pynkhreh ia ka Detailed Project Report (DPR)” la ong u Bah Prestone.
