Ka long ka khubor kaban ai mynsiem shikatdei ia ki thei samla kiba don sap ha ka iakop thei bhabriew, ha kaba ha kane ka kynti la mihpaw sha kawei pat ka samla lud kaba la shah jied marwei na Meghalaya ban ioh mihkhmat sha ka rynsan iakop thei bhabriew jong ka Miss Femina India 2024.
Ha ka jingkren bad ki Nongthoh Khubor ha Shillong Press mynta ka 27 tarik Nailar, ka samla Angielia N Marweiñ, ka la pynpaw ia ka jingkmen kaba khraw ban shah jied sha katei ka jingiakop thei bhabriew kaba kham paw jong ka ri India kaba la tip kum ka Miss Femina India 2024.
Ka la iathuh ruh, ba ka shnong trai ka dei napoh Pariong bad sah pule pat ha nongbah Shillong bad ka dang pule iaka Master jong ka Political Science ha St. Anthony’s Colleg.
“Ngam pat ju mih pyrthei ha kum kine ki rynsan iakob thei bhabriew, hynrei ha kane ka kynti ba dang ka jingpynshlur bad ai mynsiem ki paralok khamtam ka jingkyrshan kaba nga ioh na la ki bahaiing hasem ka la pynlong ia nga ban leit mihkhmat ha ka audition kaba la long ha nongbah Guwahati bad nga la shah jied ban mihkhmat na Meghalaya sha katei ka rynsan napdeng ki 5 ngut kiba la shimbynta na Meghalaya ha ka audition”, pynpaw ka samla Angielia.
Ka la iathuh ruh, ba kane ka dei ka beauty pageant kaba nyngkong eh ba ngan shimbynta bad ban mihkhmat ia la ka jylla ha ka Femina Miss India, bad nga don ka jingkyrmen ba da ka jingkyrshan lang da ki nongshong shnong ka jylla Meghalaya ngan ioh poi sha ka thong jong ka jingjop.
Kane ka samla ka la ai mynsiem ruh, ia kiwei pat ki samla kiba don ia ka sap ban mih shakhmat ban shimbynta ha kum kine ki rynsan, namar kumba long hi ka jylla Meghalaya ka dei kawei na ki jylla kiba kyrshan bha ia ki samla kynthei ban kyntiew ha kiba bun ki liang, da kaba kyrpad ruh ia ki paidbah ba kin like, share ia ki social media jong ka kum ka jingkyrshan ban kynjoh sha ka final jong kane ka rynsan iakob thei bhabriew.
Ka thup iakhun ia ka phainal jong ka Femina Miss India 2024 yn pynlong ha nongbah Mumbai ha u bnai Risaw 2024.
