Shillong, Lber 05: U MLA ka 10- Jirang Constituency u Bah Sosthenes Sohtun, haba shimbynta ha ka jingkren ha ka iingdorbar thawain ban iatai halor ka Budget Session da kaba wanrah ia ka Call Attention Notice ban pynpaw ia ka jingsngewkhia kaba jur halor ka jinglong jingman jong ka lyer hapoh ka thain Byrnihat na ka jingdon jong ki karkhana kiba pynkhein ia ki kyndon ain bad ba la buh jingma pat ia ki paidbah kiba ring mynsiem ia ka lyer jaboh.
Haba kren ha kane ka sngi, u Bah Sosthenes Sohtun, u la wanrah ia ka mat kumba la pynpaw ha kawei ka lad pathai khubor jong ka ‘India Today’ kaba la pynmih ia ka khubor halor ka jingjaboh jong ka lyer ha Byrnihat katkum ka kaiphod jong ka Guwahati Air Quality Index na ka Central Pollution Control Board (CPCB) kaba la pynmih ha ka 28 Kyllalyngkot 2025 ha kaba katkum ka AQI ka jingkhein jong ka jingjaboh jong ka lyer ha Byrnihat ha ka 26 tarik u Kyllalyngkot 2025 ka poi haduh 341.
“Kum u nongmihkhmat paidbah, nga don ka jingsngewkhia kaba jur halor ka jinglong jingman jong ka thain Byrnihat kaba don shibun ki karkhana bad ruh mar syndah bad ka jylla Assam ha kaba ki don ki karkhana kiba treikam marsyndah bad kane ka thain ha kaba ka jingmih jong ka lyer puipui kaba jakhlia ka lah ban ktah ruh ia ka koit ka khiah jong ki nongshong shnong khamtam ki khyllung khynnah”, Pynpaw u Bah Sohtun.
U la ong ruh, ba ymtang ka jingmih jong ka lyer jaboh hynrei ki don ruh ka jingpynmih ia ka jingsma iwtung kaba jur na ki karkhana, ka jingsawa kaba ktah ia ki paidbah kumta, ka long kaba donkam kyrkieh ba ka sorkar jylla kan shim ia ka sienjam kaba tyngeh pyrshah ia kito ki karkhana kiba pynkhein ia ki kyndon katkum ka Meghalaya State Pollution Control Board.
Shuh shuh ruh, u Bah Sohtun u la buh ia ka jingkyrpad na ka sorkar Meghalaya ba kan buh noh ia ka ophis treikam kaba pura jong ka Meghalaya State Pollution Control Board ha Byrnihat bad ruh ban pynkhlain ia ki nongtrei khnang ban pynsuk ia ka jingtreikam bad ruh ban peitngor ia ka jingleh beain jong ki karkhana kiba don ha kane ka thain bad ruh u la buh ka jingdawa ba ki Karkhana ki dei ban buh da ki kor ki bor kiba dei katkum ka juk stad mynta ban pynduna ia ka jingpynmih ki lyer jaboh da kaba ki hap ban thung dieng ruh ha ki sawdong sawkun ki Karkhana.
Haba jubab ia ka jingpynpaw jong u MLA ka Jirang Constituency, u Conrad K Sangma kum u Myntri Rangbah ka jylla, u la pynpaw ba ka sorkar jylla ka la dep ban shim ia ka sienjam kumno ban tehlakam ia ka jakhlia jong ka lyer ha Byrnihat bad ruh la shim da ka sienjam kaba tyngeh pyrshah ia kito ki karkhana kiba pynkhein ia ki kyndon ain.
U la iathuh ruh, ba dang shen ka Meghalaya State Pollution Control Board ka la pynlong ia ka jingjurip kaba syndet ia ki karkhana ha Byrnihat bad la khang ruh kumba 7 tylli ki karkhana bad ruh ban dain kuna ruh ia ki katto katne ki karkhana bad ka jingjurip kan iai bteng na ka por sha ka por ban lap ia kiwei pat kiba pynkhein ia ki kyndon ain.
Shuh shuh ruh, u la bynrap ba ka thain Byrnihat ka dei kaba don marsyndah bad ka jylla Assam ha kaba ki don ki karkhana ha kine ki bynta kiba pynmih ia ka tdem jakhlia, kumta ka long kaba kongsan ban ioh ia ka jingiatreilang ruh bad ki bor ka sorkar jylla Assam ha kaba yn sa thoh ruh sha u Myntri Rangbah ka jylla Assam na bynta ban peitngor ia ki karkhana kiba pynmih tdem jakhlia bad pynkhein ia ki kyndon ain.
