Shillong, Risaw 15: Ka Nongialam ka party NPP bad kaba dei ruh ka myntri sorkar ka Dr. Ampareen Lyngdoh ka la pynpaw ba ka party NPP ka la long kaba la khreh ban ia aireng ha ka election shiteng samoi na Gambegre Constituency bad ruh ka bynta ka election MDC ha ki ar tylli ki ADC kata ka Khasi-Jaintia Autonomous District Council.
Haba kren sha ki lad pathai khubor ha ka sngi Nyngkong, ka Dr. Ampareen Lyngdoh ka la ong, “ ka NPP Party ka la pynkhreh shaid shaid ban ia khun ia kitei ki election, la ka dei ha ka election shiteng samoi na Gambegre Constituency bad kynthup ruh ka election MDC ha kaba ka party ka long kaba la pynkhreh”.
Ka la ong ruh ba ka party NPP kan ia khun tyngeh ban pynjop ha kane ka election shiteng samoi na Gambegre Constituency, namar ka party ka donkam ia ka jingbun paid ban pynneh ia ka jingsynshar ha ka jylla.
“Ngim tip ha kano ka rukom ba ka jingiakhun kan long bad ka NPP ka mih shakhmat, ngi duwai ba kan nym don kano kano ka jingiapaid ia pra ha ka imlang ka sahlang, ha ka jingtreikam, ha ki niam bad ka NPP kan leh ia kaba bha tam” ong ka Dr. Ampareen Lyngdoh.
Shuh shuh, ka Dr. Amapareen Lyngdoh ka la ong ba ka party NPP kan pynieng ia ka kurim u Myntri rangbah ka jylla ka Mehtab Chandee Sangma ha ka election shiteng samoi na Gambegre, kaba dei hadien ka jingiehnoh kam u Saleng A. Sangma kum u MLA, kaba dei hadien ba u la jop ha ka election MP na Tura.
