Shillong, Lber 04: Hadien ba la pynskhem ia ka shuki kum u Chief Executive Member (CEM) ka Khasi Hills Autonomous District Council, u Bah Shemborlang Rynjah mynta ka 4 tarik Lber, u la shim ia ka bynta ban bhah kam sha ki 7 ngut ki MDC ka Voice of the People’s Party (VPP) kiba la shah thung kum ki Executive Members (EM).
Kumba la pynbna mynta ka sngi, na ka liang u Bah Shemborlang Rynjah kum u CEM, u la bat ialade ia ki tnat kum ka General Administration Department, Posting & Transfer, Eastablishment, Appointment, Market, Eleka, Forest bad kiwei kiwei.
Ka bhah kam ba la aiti sha ki MDC ba la shah jied kum ki EM, ki kynthup u Bah Winston Tony MDC ka Nongthymmai un bat ia ka tnad Labour, Trade, Enforcement bad Revenue, Bah Isnei Hinge MDC ka Umroi un bat ia ka tnad Water Resources, Fisheries, u Bah Powell Sohkhlet MDC ka Mawthadraishan un peit ia ka tnad IT, Land & Development, u Bah Pynkhraw Kharjahrin MDC ka Mawkyrwat un peit ia ka tnad Council Building bad Council Assets, Building Byelaws, u Bah Seiborlang Warbah MDC ka Mawkynrew un khmih ia ka tnad Finance.
Shuh shuh ruh ki arngut ki longkmie kiba la shah jied kum ki EM kiba kynthup ia ka Kong Aibandaplin L Nonglait ka MDC na Mylliem la bhah ba kan khmih ia ka tnad Health & Sanitation, Education bad ka Kong Deiti Majaw ka MDC ka Laitumkhrah-Malki kan khmih ia ka tnad Law & Legal Matters, Marriage & Divorce, Town Committee.
