Shillong, Lber 04: Ka sorkar Meghalaya ka la hap ban pynphai kylla noh ia ka pisa kaba T.200 klur tyngka ba la bhah da ka sorkar pdeng, kaba dei hadien ka jingbym lah ban pynurlong ban wan rah ia ka surok Rel hapoh ka jylla.
Ia kane ka la pynpaw da u Myntri rangbah ka jylla u Conrad. K Sangma ha ka dorbar mang tyngka mynta ka sngi ha ïing Dorbar thaw aiñ, haba iarap ban jubab ia ka jingkylli ba la wan rah da u Adelbert Nongrum, MLA ka North Shillong Constituency, ban pan jingshai na u Myntri ka tnad Transport halor ka jingioh pdiang ia ka song pisa kaba T. 200 klur na ka sorkar pdeng kaba dei halor ka jingpyntreikam ia ka surok rel ha ka jylla.
Kumba la pynpaw da u Myntri ka tnad Transport u Bah Sniawbhalang Dhar bad ruh u Myntri rangbah ka jylla, u Conrad K. Sangma, ia katei ka song pisa kaba T. 200 klur la mang da ka sorkar pdeng ha ka 30 tarik u Lber 2017 bad katei ka pisa ka don ha ka ophis u Deputy Commissioner na ka daw ba ym pat lah ban pyntreikam ia ka surok rel bad ka NFR
Haba pynshai ia ka jingkylli ba la wan rah da utei u MLA ka North Shillong Constiteuncy, u Myntri rangbah ka jylla u Conrad K. Sangma bad ruh u Myntri ka tnad Transport u Bah Sniawbhalang Dhar, ki la pynshai ba ka jingthmu jong katei ka pisa ba la ai da ka sorkar pdeng ka long ban siew na ka bynta ka bai lutksan ha kaba shim jaka ban shna ia ka surok rel.
La pynshai ruh na ka daw ka jingpyrshah jur ki paidbah bad ki Seng bhalang halor ka jingthmu ban wan rah ia ka surok rel sha ka jylla, ym pat lah ban ioh jaka na ka bynta ban shna ia kata ka surok rel, kaba haduh mynta ka dang sahteng bad dei ha ka 17 tarik u Nohprah 2024 ka Northeast Frontier Railway lyngba ka tnad Indian Railway ka la phah pynphai noh ia ka pisa sha ka sorkar pdeng halor ka jingbym lah ban pyntreikam ia kane ka surok rel ba la mang pisa haduh 200 klur da ka sorkar pdeng.
Shuh shuh, kumba la pynshai da u Myntri rangbah ka jylla ba la hap ban pynphai ia katei ka pisa sha ka sorkar pdeng, bad haba jubab ia ka jingkylli, u Myntri Rangbah ka jylla, u la pynpaw ruh ba ka surok rel ka long shisha kaba donkam ha ka jylla ban kyntiew ia ka ioh ka kot ka jylla bad ruh ban hiar ki dor ki mur ki marbam ki mardih bad kum u Mynti rangbah ruh u la ju kynduh na ka por sha ka por ia u Myntri ka sorkar pdeng uba la kyrpad ban shim khia bad ka long pat kaba eh namar ban wan rah ia ka surok rel la pyrshah na baroh ki liang, u la bynrap.
