Shillong, Jymmang 29: U Myntri ka sorkar jylla bad uba dei ruh u Spokesman ka sorkar MDA, u Bah Paul Lyngdoh mynta ka sngi u la ong ka jingshah khein beaiñ biang sa san snem ia ka kynhun seng HNLC, ka dei namar ba ka kynhun seng HNLC kam shym la sngap satia ia ka jingkhot ka sorkar ban wan sha ka miej jong ka jingiakren iasuk wat la ka sorkar ka la ju kyrpad la bunsien ban wan sha ka miej jong ka jingiakren iasuk.
“Ka sorkar ka dang long kaba kloi ba ka HNLC kan wan sha ka miej jong ka jingiakren iasuk. Haba kren halor kane ka kynhun seng HNLC ka long sa tang kawei ka sienjam ba kan lait noh na kata ka jingshah khein kum kata ka kynhun seng beain ha ka sorkar, hynrei namar ba kam sngap ia ka jingkhot ka sorkar, kane ka jingshah khein beain ka la dang bteng biang mynta” ong u Bah Paul Lyngdoh sha ki Nongthoh Khubor mynta ka sngi Palei jong ka taiew.
U la ong ruh haduh mynta ruh ka sorkar jylla ka dang khot ne kyrpad ia ka kynhun seng HNLC ba kan wan sha ka miej jingiakren bad ka jingkhang ka dang plie.
Halor kane ka jingkheiñ beain ia ka kynhun seng HNLC, ka UAPA Tribunal ruh dang shen ka la rai ban kyrshan ia ka rai jong ka Ministry ka Home Affairs na ka bynta ban dang pynbna lane khien ia ka seng HNLC sa san snem kum kata ka kynhun seng kiengatiar ba la khein beain.
