Shillong, Jymmang 29: Da ka jingbteng ban leh da kaba tyngeh pyrshah ia ki bar jylla kiba wan trei bylla beaiñ ha ka jylla Meghalaya, palat 32 ngut ki nongtrei be-aiñ na bar jylla la ioh bat bad la pynphai biang ia ki ha ka jingkhynra kaba ar sngi ba la pynlong da nongialam jong ka Khasi Students’ Union (KSU) Mawlai Circle ha Mawlai Iewrynghep bad ha ka jaka NEHU.
Ha ka jingbteng ban khynra bar jylla, kumba 25 ngut la lap ha ka jaka NEHU bad 7 ngut ha Mawlai Iewrynghep, pyntip u General Secretary ka KSU, u samla Eddie Malngiang.
“Ngi la rai ban pynkhlaiñ shuh shuh ia ka jingkhynra pyrshah ia ka jingwan tuid be-aiñ ki bar jylla katba ka sorkar kam pat pyntreikam ia ka Inner Line Permit (ILP) bad ka Meghalaya Identification Registration (Safety & Security) of Migrant Workers 2025 Amendment,” u la bynrap.
