Shillong, Rymphang 29: U Myntri ba dei khmieh ia ka tnad Jngoh Kai Pyrthei, Bah Paul Lyngdoh, u la ong ba ka Sohra ka dang long ka jaka kaba shngain bad kabym don jingsyier na bynta ki paid nongjngohkai pyrthei kiba wan na kylleng ki jaka bad kane ka thaiñ ka dei kaba pawnam na ka bynta ki nongwan kai pyrthei, wat la don ki jingjia ba dang shen jong ka jingjah jong ka shikurim kiba na Indore Madhya Pradesh.
Haba kren bad ki Nongthoh Khubor, u Bah Paul Lyngdoh u la kyntait, ia ki hamsaia ba kam don jingshngain ban wankai sha kane ka jylla ne thain Sohra, da kaba kdew, ba ka jingkiew jong ki nongwan ha Sohra ka pyni ba ngi don ka rukom jngoh kai pyrthei kaba shngain kata naduh ki hotel, ki jaka sah kai, bad ki iing sah miet ki dap beit da ki nongwan jngohkai pyrthei kiba na kylleng ki jaka.
Ha kaba ia dei bad ka jingjia jah rngai jong ki shi kurim ha ka thaiñ Sohra, u Bah Paul u la ong, ba ka long shisha ka khubor kaba sngewsih bad kaba la ktah shisha iaka jingmut jingpyrkhat khamtam ha kine ki shikurim ki la jied khnang ia ki jaka jong ka jylla Meghalaya khamtam ka Sohra ban wan leh kmen tang mar ia dep shong kurim, watla katta na ka liang ki bor ka sorkar jylla ka dang bteng ban pynlong ia ka jingwad ia kine ki shikurim bad kyrmen ban lap noh ia ki.
Ha kaba ia dei bad ka jingong, bym shngain ka Sohra, u Bah Paul u la kyntait ia kane ka kyntien, da kaba pynianujor ruh, “Uwei u briew na Shillong u la jah ha Thailand hynriew bnai mynshuwa bad ym pat shym la shem haduh mynta hato phi lah ban ong ba ka Thailand kam long kaba shngain?”
U la iathuh ruh, ba ha kino kino ki jaka jngohkai pyrthei ki nongialam lynti (guide) ki don beit kum ha ki jingkieng jri (double decker bridge) bad kiwei kiwei hynrei lada kita ki nongjngohkai pyrthei kim treh ban pyndonkam ia ki bad ba ki jied hi ban iaid dalade sha ki jaka kiba donkam ia ki nongialam lynti, ha kum kata te ka sorkar jylla kan lah ban leh aiu, namar ka dei ka mon jong ki.
Halor ka jingkynthoh na ka longiing jong u briew ba jah ba ka jingpyrshang ban wad ka long kaba suki, u Bah Lyngdoh u la ong, “Ki bahaiing mynta ki don hapdeng ka jingkhih mynsiem bad kordit (shock) kumta ki lah ban pynmih ia kino kino ki kyntien, hynrei kumba long ka jingwad ia kine ki shikurim ka long kaba sted bad kaba da phikir bha namar ba kane ka thaiñ ka dei ka thain kaba don ki lum ki wah kiba eh bha ban poi kumta na bynta ka jingshngain jong baroh ka jingbud ryntieh ia ki kyndon ruh hap ban peit lang.
U Bah Paul u la pynkynmaw ruh, ba na ka por sha ka por ki bor ka sorkar jylla ka ju pynmih ia ki jingkyrpad sha baroh ki nongwan jngohkai pyrthei haba ki iaid ki ieng ha ki jaka jngohkai pyrthei ki dei ban long kiba husiar bad ban bud thik ia ki kyndon ba la buh na bynta ka jingshngain jong ki, khamtam ha kine ki aiom slap, u la bynrap ba kine ki shikurim ruh ki la iaid palat ia kaba ki dei ban leit khamtam sha ki jaka bym long shngain, hynrei kyrmen ba ka jingpyrshang bad jingtreishitom ban wad ia kine ki shikurim kan long kaba seisoh.
