Jowai, K’lyngkot 20: Haduh 18 ngut ki Khar Bangladesh, 5 ngut ki dribar bad 2 ngut ki nong India kiba iarap ban pynrung ia ki Khar Bangladesh sha India ki la shah kem mynta ka step ha ki Pulit ka West Jaintia Hills.
Kumba la iathuh da u heh Pulit ka West Jaintia Hills, u Jagpal Singh Dhanao, la ong ba ki kynhun Pulit ka West Jaintia Hills bad ryngkat ka jingiarap u Rangbah Shnong bad ki VDP ka Demthring ki la pynlong ia ka jingkhynra kaba jur mynta ka step bad lyngba kane ka jingkhynra bad talasi la ioh ban kem nyngkong eh 4 ngut ki Khar Bangladesh bad kawei ka Kali ba la niah da u Vishal Dkhar na Dawki ha ka por 3 baje mynstep. Ia kane ka Kali la ia beh naduh Lad Demthing bad la ioh ban bat ha Sanmala Guest House Amlarem.
Ha kane ka jingiakhynra bad talasi la ioh ban ruh ban kem ia 2 ngut ki nong India kiba iarap ia kitei ki Khar Bangladeh ba la tip kyrteng kum u Meban Dkhar bad u Melari Rasmut ba la ioh ban bat na Lad Demthing ryngkat ka Kali kaba ki pyndonkam kaba don ia u number ML-04D-4739.
La iathuh ruh ba ha ka jingtohkit bniah la ioh ruh ban bat sa 3 tylli ki Kali kiba kit ia ki Khar Bangladesh da kaba pyndonkam ia ka surok na Jowai sha Dawki.
Da kaba ioh jingtip ba dang don ki Khar Bangladesh kiba thmu ban rung sha India, la pynlong ia ka jingpynap shrip ha iew Amlarem bad la ioh ban bat sa 3 tylli ki Kali ba don ia u number ML-05AD-6424, ba la niah da u Blessing Pamthied na ka Shnong Jarain, ML-04D-4993, ba la niah da u Twel Rongngi na ka shnong Shkentalang bad ML-04E-0640, ba la niah da u Rimi Lyngdoh na ka shnong Shkentalang.
La ong ruh ba kitei ki Kali ki dei ki Kali ba kit beain haduh 14 ngut ki Khar Bangladesh ban pynrung na Bangladesh sha India.
“Lyngba kane ka jingkhynra ia ki Khar Bangladesh, baroh kiba la shah kem ki kynthup haduh 18 ngut ki Khar Bangladesh, 2 ngut ki Nong India ba iarap pynrung sha India, bad 5 tylli ki Kali ba la ioh ban bat” ong u Dhanao bad bynrap ruh ba la dep ban register case ia ki katkum ka kyndon jong ka Immigration and Foreigners Act, 2025 bad ruh ba ia kitei ki briew la rah noh sha thanad na ka bynta ka jingtohkit kaba kham bniah, u la ong.
Ha kawei ka bynta, u la pynpaw ruh ba ki Pulit ka West Jaintia Hills kin dang peitngor bha nangne shakhmamt ha kitei ki thain khappud bad kyrpad ruh ia ki Rangbah Shnong, ki VDP ban iarap ne ia snoh kti lang na ka bynta ban iada ia ki kam sniew bad kumjuh ruh halor kane ka jingwan rung beain ki Khar Bangladesh sha India.
