Nongpoh, K’lyngkot 20: Tang na ka daw ka jingthung ia ki nar post ilektrik ha ka Shnong Maikhuli ka shnong khappud ka Meghalaya bad ka Assam bad mynta ka sngi la mih ka jingiashoh iadat hadien ba ki nongshong shnong na ka Shnong Bakrapara Assam ki la wan ban khang ban thung ia kitei ki Post Ilektrik ba la wan thung da ka MeECL ha ka Shnong Maikhuli ba hap ha Pilangkata Police Outpost ha Ri Bhoi District.
Ha kane ka jingiashoh iadat, u Rangbah Shnong ka Maikhuli ruh u la shah shoh shah dat ha ka kynhun jong ki briew kiba dei na Assam kiba wan ban pyni bor halor kane ka jingthung post ilektrik haka shnong Maikhuli ba ki kam ba ka jaka ka la hap sha Assam.
Kumba la ioh lum jingtip, dang shen ruh ka la don ka jinghuri hura ha katei ka shnong Khappud ka Meghalaya bad Assam kaba dei hi halor ka jingwan thung post ilektrik ka Assam, hynrei ia kane jinghuri hura la lah ban tem noh da ki bor synshar District ka Ri Bhoi bad na Kamrup ha kaba ki la ia soi ruh da ka soskular iasuk (border Peace Committee) ban num pynthud ia ki kam pynroi, hynrei mynta ka sngi la mih biang ka huri hura hadien ba ka MeECL ka la thung ia ki post ilektrik ha ka shnong Maikhuli ba la wan pat ban pyrshah da kiwei ki briew ka Assam na ka shnong Bakrapara..
La ioh jingtip ruh halor kane ka jingthung post ilektrik ka MeECL la shim bynta bad iarap lang da ki paidbah nongshong shnong bad dei halor ka jingthung ia kine ki post ilektrik ba la kot kumba 5 tylli ei ei, ba ki briew ka Assam na Bakrapara ki la wan ban pyrshah bad haduh ba la mih ka jingiashoh iadat hapdeng ki nongshong shnong na Maikhuli bad na katei ka shnong Assam.
