Shillong, Jymmang 29: U Myntri rangbah ka jylla, u Conrad K Sangma mynta ka sngi u la pynpaw ia ka jingsngewlem halor ka jingbym pat lap ia ki shijur kiba la jah sha Sohra bad wat la katta ruh u don ka jingkyrmen kaba skhem ban lap noh ha kaba ka jingiaid wad ka dang bteng haduh mynta ka sngi.
Kine ki shijur kiba la jah na ka jylla Madhya Pradesh sha Sohra naduh ka 23 tarik u Jymamang 2025 ki kynthup ia Raja Raghuwanshi bad ka Sonam kaba dei ka kurim jong u, kaba ki dang shu dep iathoh ha ka 11 tarik u Jymmang 2025 bad ha ka jingwan lehkmen hadien ka jingiathoh shong kurim sha Meghalaya ka la long pynban ka khubor kaba sngewsih hadien ba ki la jah bad ym pat lap dien satia shano ki la jah.
Haba kren sha ki lad pathai khubor, u Myntri Rangbah ka jylla, u Conrad K. Sangma, u la ong ba kane ka jingjia ka long ka jingjia kaba sngewsih, ha kaba ki shijur na ka jylla Madhaya Pradesh ki la wan ban shangkai pyrthei sha ka jylla Meghalaya sha ka thain Sohra, hynrei khlem poi pyrkhat ba kane ka jingjia ba sngewsih kan jia ha kaba haduh mynta ym pat lap ksai halor kane ka jingjah jongki.
U la ong ruh ba u Myntri rangbah ka jylla Madhya Pradesh, u Mohan Yadav u la phone ia u bad u la kyrpad ban iarap lem ban pynkhlaiñ ia ka jingwad ia kine ki shijur bad na ka liang ka sorkar ruh ka la shim khia bad kam sym la shongkli kti ha kaba ka jingwad ia kine ki shijur ka dang jur da ki bor sorkar kiba dei peit ha kane ka kam.
Shuh shuh, u la pyntip ruh haba wad ia kitei ki shijur la shim bynta ruh naduh ki shnong ki thaw bad k paidbah ryngkat ki bor sorkar bad u khmih lynti ba kane ka jingbteng ban iai wad kan sa long kam ban lap noh ia kitei ki shijur kiba la jah sha ka thain Sohra.
