Shillong, Jymmang 29: Halor ka jingsapriang kawei ka dur khih ha ki rynsan social media, ha kaba la kynnoh ba uwei u briew u la leh kynshleiñ ia kawei ka khynnah skul da kaba khylliedia ka skirt katba ka dang iaid lynti bad da ka jingshim khia ki bor Pulit ka East Khasi Hills lyngba ka kynhun ba la thung kyrpang la ioh noh ban kem ia utei u runar.
Ka kyrwoh khubor na ki Pulit ka East Khasi Hills, la ong ba halor kane ka jingjia ki Pulit ka East Khasi Hills ki la ioh jingtip ha ka 24 tarik u Jymmang 2025 ba ka la don ka dur khih kaba la saphriang sha ki rynsan Social Media, ba uwei u runar u la leh kynshlein bad khylliedskirt ia kawei ka khynnah skul bad dei lyngba ka kynhun kyrpang ba la thung ha ka 26 tarik u Jymmang 2025 ba la khlieh da u Additional Superintendent of Police, East Khasi Hills, u Bah Ivan B. Diengdoh ban pynlong ia ka jingtohkit.
Kane ka jingioh kem ia utei u runar ka dei ha ka jingialam ka Women Police Sub-Inspector, ka Kong Lavinia Kongwang lem bad ka kynhun kiba la hiar sha Jorhat ban budien, ha kaba ki la ioh kem noh mynta ka sngi ia une u runar ba la tip kyrteng kum u Himan Gogoi, 24 snem ka rta na ka ingsah kiba haïing jong u ha ka shnong Bamkukurachua ba hap ha ka Teok Police Statioin, Jorhat.
Kum ban pynkynmaw, akne ka jingjia kumba la pynpaw ha ka kyrwoh ki Pulit ka dei ha Umsohsun ban leit sha YWCA, kaba la jia ha ka 23 tarik u Jymmang 2025 ba u runar u la khylliedia ka Skirt katei ka khynnah skul bad ruh la dep ujor ejehar ha Lumdiengjri Police Station katkum ka Case number 55(05)2025 U/s 76/79 BNS R/w Sec. 11/12 POCSO Act.
Kane ka kynhun ba leit tohkit ka ioh kurup ruh ia ka Mobile Phone ba la pyndonkam da une u runar ha kitei ki kam beaiñ bad ryngkat ki sakhi ruh kiba u la leh ia kitie ki kam. Nalorkata, une u runar u la don bynta ruh ha kiwei ki kam leh kynshlein ba la ujor pyrshah ia u ha Teok Police Station kaba dei katkum ka Case No. 43(03)25 u/s 329(3)/79 BNS Act.
Shuh shuh, la ong ruh ba ia une u runar kin phah shwa sha ka District Court ha Jorhat halor kitei kiwei ki kam sniew ba u la leh bad hadien ba la ioh bor kin sa wan rah pat sha Shillong ban phah sha ka District Court ha Shilong ban bishar halor kitei ki kam sniew kiba u la leh.
