Nongpoh, Jylliew 01: Ka jingkynnoh u Myntri Rangbah ka jylla Assam, u Himanta Biswa Sarma ba ka jingshlei um sha Guwahati ka dei na ka jingtih khyndew na Meghalaya, ka lah ban dei kaba shong ñia, namar ha kine ki ki khyndiat sngi hadien ka jingther u lapbah bun ki shnong ha Meghalaya bad sha Assam ki la shah ktah jur na ka jingshlei um, kaba dei na ka daw ka jingtih khyndew pathar na ki lum ba don ha Meghalaya ba ki khyndew, ki syiap bad ki jaboh ki tuid sha ka surokbah bad ka set ia ki nala um haduh ba la poi sha u pud ka jingshlei um.
Kum ban pynpaw, na ka jingshlei um sha sorbah Guwhati bad kiwei kiwei ki shnong khappud ka Meghalaya bad Assam, ha kine ki khyndiat taiew ba leit, u Myntri Rangbah ka jylla Assam, u Himanta Biswa Sarma u la kynnoh beit ba ka jingshlei um ka dei tang na ka daw ka jingdon ki jaka tieh khyndew beain kiba dei na ki lum ba hap ha ka jylla Meghalaya.
Kumba la lum khubor da u Nongthoh Khubor, la sakhi ba katei ka jingkynnoh u Himanta Biswa Sarma, wat la kam dei pura ka jingshisha kumba u la kynnoh bad ka lah ruh ban dei kaba shongñia, namar haba sakhi ia ki jingjia jingshlei um ba shah ktah ha ki shnong khappud ka Meghalaya bad Assam, kata naduh ka thain Pillangkata sha Maikhuli ter ter shaduh Khanapara, Baridua, Jorabat bad shaduh Umpher 12mer, kiba bun ki kynnoh ba ka dei ka jingshlei um kaba ktah na ka jingtih khyndew na ki lum Meghalaya ba ki khyndew bad ki jaboh ki tuid sha ka surokbah ba wan rah ka jingshlei um na ka daw ka jingset ki nala um ba la dap da ki khyndew bad ki jaboh.
Kumba la lap ne skahi, na ka jingtih khyndew ha ki bynta jong ki lum ba hap ha u pud u sam ka Meghalaya kum ha Jorobat, ki paidbah ki la hap ban mad ia ka jingeh kaba khraw ba ka khyndew ka la tuid sha ka surokbah haduh ba la mad jingeh ha ka leit ka wan bad ruh ba la wan rah kata ka jingshlei um kaba ngi la sakhi ha kine ki sngi hadien ka jingther u lapbah, kaba la jia ha Jorobat.
La sakhi ruh kitei ki khyndew bad ki ktieh ba la tuid ha Jorobat na ka jingtih khyndew na Meghalaya, ka bor sorkar ka Assam ka la hap ban shim khia bad shim ia ka jingkitkhlieh ban pynkuid ia ki ktieh bad ki khyndew ha kaba da ki phew Trok la hap ban pynkhuid bad kit khnang ban suk ki paidbah ha ka leit ka wan bad ruh ban lait na ka jingshlei um.
Haba sakhi halor kane ka jingjia, la dei ban ai jingiaroh ruh ia ka seng FKJGP Byrnihat Circle, ha kaba hynnin ka sngi la sakhi ba ka leit ban tuklar ia kawei ka jaka tih khyndew ha Jorobat bad kaba la pynlong ruh ia ka seng ban khang tala ia ka khyrdop ban rung sha katei ka jaka tih khyndew, na ka daw ba ki paidbah ki la ud bad ki la kynduh mawsiang ha ka leit ka wan na ka jingtuid ki ktieh bad ki ahor sha ka surokbah bad ruh kaba la wan rah ka jingshlei um.
