Shillong, Jymmang 31: Ka jingnang bteng ban hap jong u slap ha kylleng ki jaka jong ka jylla Meghalaya, la iohlum khubor ba la don ki jingjia ba sngewsih ha kaba 2 ngut ki briew ki la duh noh ia la ka jingim bad katto katne ngut ki la mynsaw na ka jingshlei um bad twa khyndew, ha ryngkat ki jingjia shah pynjulor ki iing ki sem, ki iingskul, ki jingtwa surok bad ka jingshah pynkhyllem ki post ilektrik kiba la jia mynta la 3 sngi kynthih.
Katkum ka kyrwoh ba la pynlait lyngba ka jingialang kaba kyrkieh ba la lum da u Myntri Rangbah ka jylla Meghalaya u Conrad K Sangman bad ki Deputy Commissioner jong ki District bapher bapher ka jylla, la ioh ban iatai halor ka jinglong jingman jong ka mariang na ka jingiai bteng ka jinghap slap, ka jingeh ka eriong, ka jingpom pyrthat bad kiwei kiwei kiba la wanlam ia ka jingduh ei ki mynsiem briew, ki jingjulor ia ki jingdon jingem ki paidbah, ki skul, ka jingthut ha ka jingsam bording, ka jingshlei um ha kylleng ka jylla Meghalaya.
Lyngba kane ka jingialang, la ioh ia ka kaiphod ba la wanrah da u Sanjay Goyal, IAS, Commissioner & Secretary ka tnad Revenue and Disaster Management katkum ka jingioh lum kaiphod kyllum na ki district bapher jong ka jylla, ha kaba la kdew ba ka la don jingjia ba sngewsih ha kine ki 3 sngi ba la ban ka jingthut ha ka bor mariang na ka jinghap slap, ka jingtwa khyndew ha kaba 2 ngut ki la duh noh ia ka ka jingim bad 3 ngut ki la mynsaw ha ki jingjia twa khyndew bad ngam jyllop kiba la jia hapoh ka East Khasi Hills District.
Ka kaiphod ka la iathuh ruh, ba kiba la khlad noh la tip kyrteng kum ka Kong Klosliya Kharkongngor (50), na ka shnong Lumkyntung kaba hap hapoh Laitkroh, Khatarshnong Block East Khasi Hills District kaba la khlad na ka jingtwa khyndew bad u Samborlang Tariang (35) na ka shnong Mawbynna, Pomlakrai East Khasi Hills District u ba la khlad na ka daw ka jingngam jyllop. Kumba 3 ngut ki la mynsaw ha ki jingjia ba la jia na ka jingthut ka mariang.
Shuh shuh ka kaiphod la iathuh ruh, ba ha kine ki 3 sngi ba la thut ka mariang ki la don jingjia, ha kaba 3 tylli ki iing skul bad 12 tylli ki iing briew ki la shah pynjulor, kynthup ruh ka jingjulor ka la ktah ia palat 25 tylli ki Shnong ha kaba palat 1023 ngut ki nongshong shnong ki la shah ktah bad ruh ia kiwei kiwei ki jingtei kiba la shah pynjulor.
Na kane ka kaiphod, ki district kiba la shah ktah jur ki kynthup ia ka East Khasi Hills District, ka Ri Bhoi District, ka West Garo Hills District, ka South West Garo Hills District, ka East Jaintia Hills District, ka Eastern West Khasi Hills District, West Jaintia Hills District.
