Nongpoh, 02 Jylliew: Hynnin ka sngi u Blei ha ka por 5 baje eiei janmiet, la don kawei ka jingjia aksiden hapdeng ki ar-shaka bad kaba la jia surokbah NH-6, hakhrum ka jingkieng suin ha Lad Umroi bad ha katei ka jingjia, u nongniah jong kawei ka Scoter bad nongniah Scoty, ki la mynaw.
Ka tyllong khubor na ki Pulit, la ong ba kawei ka Scoter kaba don ia u ML-05-C-2331, ia kaba la niah da u Thymmai Bor Rapsang, ka la shah tynrah nadien ha kawei pat ka Scoty kaba la pynher sted bha, kaba la niah da u Jerry Shylla, ha ryngkat bad uwei u paralok uba shong hadien.
Shuh shuh, ka tyllong khubor na ki pulit, ka iathuh ruh ba tang mar ia jia katei ka jingjia aksiden, utei u paralok jong uba niah ia ka Scoty, u la phet krad noh na katei ka jaka. Hadien kata ba la jia katei ka jingjia aksiden, la don ki briew ki bym lah ban ithuh, ia kaba la suba ba ki dei ki paralok jong utei uba niah Scoty, ki la rah bad pynkynriah noh ia katei ka Scoter na ka jaka ba la jia ka jingjia aksiden, kata shwa ba ki pulit kin poi ha katei ka jaka.
Ki pulit ki la iathuh ruh, ba katei ka Scoty, kaba la leit ban tynrah ia katei ka Scoter, ka dei kaba rong stem bad kaba don ia u ML-05-AE-2887. Haba iadei bad katei ka jingjia, la rah noh ia kitei kiba la mynsaw sha Nongpoh Civil Hospital, na bynta ban ioh ia ka jingsumar kaba biang.
