Nongpoh, Rymphang 19: Ha kawei ka jingjia aksiden kaba shyrkhei ha shnong 17 Mer, Ri-Bhoi District, hynne ka step haka por kumba 8 baje eiei, 7 ngut ki khynnah skul ki la mynsaw jur hadien ba kawei ka trok kit Clinker ka la tynrah nadien ïa ka bos skul kaba dang ap khynnah.
Katkum ka jingïoh lum jingtip, katei ka bos ka dei jong ka skul Mt. Zion Higher Secondary School, 15 Mer Byrnihat, ka dang ap ban shaw khynnah na 17 Mer bad ha katei ka por ba ka trok kaba don ïa u nombor NL-01 AA-4672 ka la leit ban tynrah beit nadien katei ka bos kaba kit kumba 20 ngut eiei ki khynnah.
Ha kane ka jingïatyngkhuh, 7 ngut ki khynnah ki la mynsaw jur bad la pynkit mar mar ïa ki sha Guwahati ban ïoh jingsumar kaba kham kloi bad paka. Katba kiba mynsaw malu mala la pynkit sha Byrnihat PHC ban ïoh ia ka jingsumar kaba mardor.
Hadien katei ka jingjia, ki pulit ka Byrnihat Police Outpost ki la hiar mardor sha katei ka jaka ban pynlong ïa ka jingtohkit. La ïathuh ruh ba u nongñiah ka trok u la pyrshang phet, hynrei ki pulit ki la kem noh ïa u ban tohkit bniah halor kane ka jingjia.
