Nongpoh, Rymphang 18: Ka seng Congress lyngba ka Sangathan Srijan Abhiyan kala buh thong ban pynkhlaiñ bad pynthymmai ïaki buit treikam naduh tynrai da kaba jied ruh da ki nongïalam ba thymmai ha manla ki district jong ka jylla Meghalaya khnang ban tip ïaka jingeh jong ki paidbah bad halor kane naka liang u John Richard Lobo uba dei observer ka All India Congress Committee u la wan ban iuhkjat ha Ri-Bhoi District naka bynta ban pyrkhat kumno ban pynkhlaiñ ïaka party bad khamtam ban ioh ban jied noh ïa u nongïalam ba thymmai kumba ka Ri-Bhoi District mynta ka don tang u Adhoc President.
Haba kren sha ki lad pathai khubor ha Umsning u John Richard Lobo u ba la phah da ka AICC haka jingdonlang u Bah Rocky Marweiñ Adhoc President ka Ri-Bhoi District Congress Committee haka jingdonlang u Bah Johnathan Syiem Vice President MPCC Youth Congress u la ong ba ka thong jong ka Sangathan Srijan Abhiyan ka long ban pynkhlaiñ ïaka seng Congress ha man la ki district namar ki don shibun ki jingeh haba phai naduh ki nongkitkam kiba rit duh, bad dei halor kane ki nongïalam kial sngewdei ban pynthymmai ïaki buit treikam bad ki nongïalam bad ban pynim ïaka seng Congress ha man ki district.
Kane ka long ruh ban ioh jied ïa u kyrtong u ba biang eh ban shimti kum u President ka District, ki Block Level bad kumta ter ter bad 3 ngut ki observer kin sa shimti ban peit bad pyndep ïaka jingangnud jong ka AICC bad kin sa shim ruh ïaka rai bad ka jingsngew jong ki paidbah, bad ïakren ruh bad ki nongïalam bad yn sa rah pat ïaka rai sha ka AICC namar ki nongïalam ba hakhlieh duh ka AICC ki kwah ba ka seng Congress kan im biang bad kan treikam namar ka seng Congress ka ieng halor ka nongrim jong ka synshar paidbah bad ka jingangnud jong ki paidbah, la ong utei u nongïalam.
U la ong ruh ba ka seng Congress kan peit bad iengskhem naka bynta ki paidbah ka ri, naduh ki rit paid, ki longkmie bad ki kynhun kiba shah iehbeiñ khnang ba uwei pa uwei u nongshongshnong un ioh ka jingmyntoi bad ka roi ka par, namarkata ban pyndep ïa kane ka thong donkam ïa u nongïalam u ba treikam bad u ba khlaiñ naduh District Level haduh ki shnong ki thaw bad ha kane ka rukom ka seng Congress kan khie im bad treikam biang ha kane ka jylla bad ka ri.
Kum u observer u John Richard Lobo u ka kyrpad sha baroh ki paidbah kiba ju kyrshan ïaka seng Congress ba kin kyrshan ïa kane ka thong bad ka jingangnud jong ka AICC namar kane ka jingthmu bad ka jingangnud kan nym urlong lada ki paidbah kim kyrshan.
U la pyntip ruh ba kum u observer un don hangne haduh ka 24 tarik Rymphang ba un sa leit sha man la ki Block ban leit ïakren markhmat bad ki nongïalam, ki paidbah ban tip kaei ka jingeh bad kumno lah ban weng ïakine ki jingeh naduh ki shnong ki thaw bad haduh ki District Level.
Naka liang u Bah Rocky kum u Adhoc President ka Ri Bhoi District Congress Committee u la ïathuh ba ka jingthmu hi jong ka All India Congress Committee ban phah wan ïaki observer sha ka District kadei halor ka jingthmu ban jied noh ïa u President ba thymmai bad ba pura jong ka Ri Bhoi District Congress Committee, kum ba ka long haduh mynta ka Ri Bhoi District Congress Committee kam pat don ïa u President ba Pura bad la shu jied ïa u Bah Rocky Marwein ban long kum u Adhoc President.
Shuh shuh u Bah Rocky Marwein u la ong ruh ba ka AICC ka la bthah ïa u observer ban leit sha man la ki Block Committee jong ka Ri Bhoi District ban kynduh ïa ki nongkitkam bad ki nongïalam jong ka Party bad ban ïa pyhyliew jingmut bad ban shim ïa ka jingai jingmut jong ki nongïalam ki Block Committee na ka bynta ban jied ïa u President jong ka Ri Bhoi Congress Committee.
