Nongpoh, Jylliew 02: Ka Ri Bhoi Youth Federation (RBYF), Western Zone mynta ka sngi haka jingialam u President u Bah Rishan Nongtri bad la synrang da ki dhot ka seng, ki la leit ban kynduh ia u Principal In-Charge ka Patharkhmah Government Higher Secondary School, na ka bynta ban ia kren halor shibun ki jingduna kiba dang donkam ban pynbit pynbiang ia katei ka shlem ai jinghikai ban kyntiew ia ka pule ka puthi ki samla pule.
Kane ka jingleit kynduh ka RBYF Western Zone ia Principal In-Charge ka Patharkhmah Government Higher Secondary School, ka dei hadien ba ka la ioh shibun ki jingud ki jingnam na ki paidbah ba ka don ka jingduna ha katei ka shlem ai jinghikai bad ban tip ia ka jingshisha ka seng ka la leit ban kynduh ia u Principal katei ka shlem ai jinghikai ia ki khynanh skul.
Kumba la pynpaw da u Bah Rishan Nongtri, president ka RBYF Western Zone haba kynduh ia u Principal, la ong ba jingduna kiba la lap ha katei ka shlem pule ki kynthup naduh ka jingduna ki nonghikai, ki nongtrei bad ka jingbym don u Principal ba pura, ha kaba la peit shipor da u Babu Bah Ioanis Umdor kum u Principal In-charge.
U la iathuh ruh kawei ka jingeh na ka jinge ka dei na ka bynta ki khynnah Class-XI kiba dang shu rung Class kiba la don haduh 180 ngut ba ki hap ban shong tang ha kawei ka Kamra Class bad kane ka buh jingeh ba kin pynleit jingmut ba la donkam ban phiah noh da ki Section.
Namarkata, na ka liang ka RBYF ka kyrpad jur ruh ia u Principal In-Charge ba un shim khia lem ia kitei ki jingeh bad ha kajuh ka por ka seng ka dawa ruh na ka tnad pule puthi ka Ri Bhoi ba kin phah ia ki bor ba dei peit ban wan jurip bad ruh ban peit bniah ia ka jinglong jingman katei ka shlem ai jinghikai khnang ba kan ai jingmyntoi shisha ia ki khynah skul kiba pule ha katei ka shlem ai jinghikai ha Patharkhmah, u la bynrap.
