Guwahati, Jylliew 03: Na ka jingïalang kaba la long hynnin ka sngi ha Guwhati hapdengu Myntri Rangbah ka Meghalaya bad ka Assam, kawei ruh na ka rai kaba ki la shim ka dei ban thung noh ïa ki mawpud ha ki hynriew tylli ki jaka ba la dep pynbeit ïa pynbeit pud bad la dep ruh ban ïa soi lyngba ka MoU.
Ïa kane la pyntip da u Myntri Rangbah ka jylla u Conrad K Sangma haba kren bad ki Nongthoh Khubor hadien ka jingïalang jong ka kynhun Myntri ka jylla Meghalaya bad Assam.
Ha kane ka jingïalang kaba dei ha ka kyrdan Myntri rangbah ka Assam bad Meghalaya, nalor u Myntri Rangbah u Conrad K. Sangma, la donlang ruh u Myntri ka tnad jngohkai pyrthei u Paul Lyngdoh, Chief Secretary D.P. Wahlang bad kiwei ki heh sorkar bad na ka liang ka Assam pat, ki kynthup ïa u Myntri rangbah ka Assam, u Himanta Biswa Sarma, ki myntri sorkar bad ki heh sorkar ka Assam.
Ha kaba ïa dei bad ki jaka ba ïa kajia pud, U Myntri Rangbah ka jylla, u Conrad K. Sangma u la pyntip ba ha ka 15 tarik u Nailar 2025 kin sa thung noh ïa ki Mawpud ha ki 6 tylli ki jak aba ïa kajia pud, kaba dei hadien ba la dep ba ïa pynbeit pud bad ruh ba la dep ban soi da ka MOU.
U la ïathuh ruh, ba dang don katto katne ki jaka ha Gijang bad Tarabari, kiba dang donkam ban pynbeit na bynta ka jingbit jingbiang jong ka jylla ka Meghalaya, shuwa ban thung ïa ki mawpud.
“Ngi la jan ban pynkut ïa ka jingthung mawpud bad sngewkmen ban pyntip, hapoh ka 15 tarik Nailar, lane shwa ka 15 tarik Nailar 2025, ngin sa lah ban ïa pynbeit bad thung mawpud ha ki san tylli ki jaka ba don ka jingïapher jingmut ne kajia ba la dep ruh ban soi ïa ka MoU). Kane kan long ka jingkut jingmut ne ka jingjop hapdeng ka jinglong paralok ka Assam bad Meghalaya. U la pyntip ruh ba ka jingïakren halor ki hynriew tylli ki jaka ba dang sah ban ïa pynbeit pud kan dang ïai bteng.
