Nongpoh, Jymmang 04: Ka Kynhun Nongshet Ja skul ba la tip kum ka Union Of Cook Cum Helpers, PM Poshan Meghalaya mynta ka sngi ki la pynlong da ka jingïalang ba kyrpang ba la tip kum ka S Special Central Executive Committee ba la pynlong ha Science Hall, Nongpoh, kaba dei ruh ka jingïalang kaba ki ïa kren na ka bynta ka jingbit jingbiang jong baroh ki nongshed ja ha ki skul.
Ha kane ka sngi la wan shim bynta ruh da ka Kong Delina Khongdup, kaba dei ka dkhot ka National Commission For Women, Government Of India, New Delhi kum ka kongsan bad la sakhi lang ruh da ka jingdon lang u Bah K.L Pariat, uba dei u Adviser ka Union Of Cook Cum Helpers, PM Poshan Meghalaya, ka kong Gina Nengnong, President Union Of Cook Cum Helpers, PM Poshan Meghalaya lem bad ki dkhot Kynhun Union Of Cook Cum Helpers, PM Poshan Meghalaya.
Ha kane ka sngi, na ka liang ka kynhun ka la dawa ruh na ka sorkar India ban pynkiew ia ka jingsiew ia ka honorarium bad ia kane ka jingdawa ki la pynsngew ruh sha ka Kong Delina Khongdup ba kan buddien lem ia ka dokhas ba ki la dep ban phah sha u Secretary ka ka tnad Education, Ministry of India.
Lyngba jong kane ka sngi, ka Union Of Cook Cum Helpers, PM Poshan Meghalaya ka la ai burom ruh ïa ka Delina Khongdup kum ka dkhot ka National Commission for Women ka India da kaba pynkup burom halor ka jingsarong ba ka dei kawei na ka longkmie kaba la ioh ban long dkhot ha katei ka Commission.
Ka Kong Delina Khongdup, haba kren ha kane ka sngi ka la pynpaw ïa ka jingkmen kaba khraw ïa kane ka kynhun ki Nonshet ja skul ha ka jylla ba ki la lah ban pynkup burom ïa ka bad kum ka dhkhot jong ka National Commissioner for Women ka la kular ban ïa trei ryngkat na ka bynta ka jingbit ka jingïabha lang ha ka liang baroh.
