Nongpoh Jylliew 4: Ka bor synshar District jong ka Ri Bhoi District mynta ka sngi ka la pynlong ïa ka jingrakhe kaba kyrpang ïa ka ‘Ri Bhoi Foundation Day’, kaba dei kata ka sngi ba ka Ri Bhoi District ka la ioh ïa ka District ba pura ha ka 4 tarik u Jylliew 1992 bad ka la ïaid lynti mynta la 33 tylli ki snem kaba long kata ka sngi kyrpang na ka bynta ki paidbah ka Ri Bhoi District.
Ha kane ka jingrakhe ïa ka Ri Bhoi Foundation Day, la pynlong ha Parish Hall Nongpoh, ha kaba la wan ban sakhi lang da ka jingdon lang u MLA ka Nongpoh, u Bah Mayral Born Syiem, u MLA ka Jirang ,u Bah Sosthenes Sohtun, u Nominated MDC ka KHADC u Bah Mathew Makdoh, u Deputy Commissioner ka Ri Bhoi, u Abhilash Baranwal lem bad kiwei ki ophisar bad ki khynnah skul, ki nonghikai bad kiwei kiwei de.
La pynphuh pynphieng ruh ïa kane ka sngi da ki jingrwai bad ki jingshad na ki khynnah skul bad ruh la rwai shoh mynsiem ruh ïa ka jingrwai Ri Bhoi Anthem, kaba long ka jingrwai kaba pynkhih mynsiem ïa ki nongshong shnong ka Ri Bhoi, kaba dei kawei na ka District kaba kaba la kham paw ha ka jylla bad ka ri.
Ki nongkren ha kane ka sngi naduh ki nongmihkhmat ba kynthup ïa u MLA ka Nongpoh, u Bah Mayral Born Syiem, u MLA ka Jirang u Bah Sosthenes Sohtun, u Bah Mathew Makdoh bad kiwei, ki la ai jingïaroh ïa ki nongïalam ba la leit noh kum u Dr. D. D Lapang, u Fr. Sylvanus Sngi Lyngdoh bad kiwei kiwei kiba la len lade bad ruh kaba long ka daw ba ka Ri Bhoi District ka la ioh ïa kata ka District ba pura ha ka 4 tarik u Jylliew 1992.
Kum ki nongmihkhmat ki la kren ruh halor ki phang bapher bapher, kiba dei na ka bynta ka jingbit jingbiang jong ka Ri Bhoi District bad ha kawei ka bynta ruh na ka bynta ban dang kyntiew ïa kane ka District kaba la kynjoh sha ka 33 snem ka jingïaid lynti la donkam ban don kata ka jingïatrei lang bad ka jingïasngewthuh lang khnang ban dang wan shuh shuh kita ki jingkylla kiba long na ka bynta ka jingmyntoi ki paidbah ha Ri Bhoi District.
