Nongpoh, Jymmang 04: Ka Trop U Barim ba la tip ruh kum ka Trop U Barim Socio and Cultural Organization mynta ka sngi ka la rakhe ïa ka Ri Bhoi Day lane ka sngi ba ka Ri Bhoi District ka la ioh ïa ka District ba pura ha ka 4 tarik u Jylliew 1992 bad shi bynta ruh ka jingrakhe ïa ka World Environment Day ba la pynlong ha Sohriewblei Kyntiewlang LP School.
Kane ka jingrakhe ka long ban kynmaw burom ïa ka jingïaid lynti ba ka Ri Bhoi District ka la kynjoh sha ka 33 snem ba ka la ioh ïa ka District ba pura bad ruh ban pynsngewthuh ïa ki paidbah halor ka jingkordor ban ïada ïa ka mei mariang.
Ha kane ka sngi la shim bynta da u Samla Garlanding Sun, uwei na ka samla ka Raid kum u kongsan bad la sakhi lang ruh da ka jingdon lang u President ka Trop U Barim, u Bah P. Rymbai, u Secretary u Bah R.M Mording, u Bah Cosmos Ramshon, uwei na u rangbah ba paw ka thaiñ, u Bah Wanbiang Maring, Rangbah Shnong ka Sohriewblei bad kynthup ruh kiwei ki riew rangbah bad ki nongshong shnong ka Raid Madan Kyrdem.
Ha kane ka sngi, na ka liang kane ka seng ka la pynlong ruh ïa ka jingthung dieng ha ki ar tylli ki jaka kata ha Sohriewblei bad ha ka Shnong Lumpuydet, ha kaba da ki spah tynrai ki deng ka la dep ban thung shi bynta ban ïada ïa ka ka mei mariang.
Haba kren ha kane ka sngi kum u kongsan, u Samla Garlanding Sun, u la ai khublei kyrpang ïa ka Trop U Barim Socio and Cultural Organization kaba la pynlong ïa kane ka prokam ban kynmaw ïa ki jingïaid lynti ka Ri Bhoi sha ki 33 tylli ki snem ba ka la ioh ïa ka District ba pura bad ruh ban hikai sha ki paidbah ka Raid Madan Kyrdem ba kin sngewthuh ruh halor ka jingkordor ban ïada ïa ka mei mariang kaba ki la pynlong ruh da kata ka jingthung dieng.
Kiwei kiwei kiba la ai jingkren ki kynthup naduh u Bah Wanbiang Maring, rangbah Shnong ka Sohriewblei, u Bah P. Rymbai, President ka Trop U Barim, u Bah Cosmas Ramshon lem bad kiwei kiwei ki riew rangbah, kiba la pynpaw ïa ka mynsiem jong ka jingkmen ban ïa rakhe ïa kane ka sngi kyrpang ba la tip kum ka Ri Bhoi Day bad ruh ban pynlong ïa ka jingthung dieng ban ïada ïa ka mei mariang.
