Nongpoh, Jylliew 04: Ban pynurlong ïa ka thong ban kyntiew ïa ka kam jngohkai pyrthei ha ka jylla bad ruh kum ka lad ban pynïasnoh ïa ka kam jngohkai pyrthei bad ka kam ïalehkai sport, ka tnad jong ka kam jngohkai pyrthei ka la ioh ban pynlait paidbah ïa kawei ka lieng shong briew kaba kham pher ïa kaba la jer kyrteng kum ka Meghalinor.
Ïa kane ka Meghalinor la wan ban plie bad kaweh lama da u Myntri Rangbah ka jylla u Conrad K Sangma, ha kaba la sakhi lang da u Myntri ka tnad kamjngohkai pyrthei u Bah Paul Lyngdoh, u Commissioner bad Secretary ka tnad kamjngohkai pyrthei Dr. Vijay Kumar D., IAS, u Bah Cyril V. D. Diengdoh, Director ka tnad kamjngohkai pyrthei, Sorkar Meghalaya.
La ïadonlang ruh ha kane ka sngi, da ki nongïalehkai kïing lieng, bad kiwei kiwei ki kynhun ïalehkai sport ka jylla.
Ha ka jingkren jong u, u Myntri Rangbah u Conrad Sangma ula pynpaw ïa ka jingdonkam ban pynïasoh ïa ka kamjngohkai pyrthei bad ki kam ïalehkai kum kawei ka lad sha ka roi ka par kaba kynthup lang ban kyntiew ïa ka sap ka phong jong ki khun samla.
U la ong ba kum kine ki sienjam ymtang ba kan pynitynnad shuh shuh ïa ka jylla ha ka liang ka kamjngohkai pyrthei ne ban kyntiew ïa ka kam Jngohkai pyrthei hynrei ki plie lad ruh ïa ki lad ïohkam ïohjam ïa ki samla nalor ban kyntiew ruh ïa ka lad iohkam iohjam jong ki khun samla.
Haba kren sha ki lad pathai khubor u Myntri ka tnad kamjngohkai pyrthei u Bah Paul Lyngdoh ula pynpaw ïa ka jingkmen jong u ba ka sorkar jylla ka la wan shakhmat ban sdang ïa ka Meghalinor Yatch kaban kyntiew ïa ka tnad kamjngohkai pyrthei ha ka jylla bad ban wanrah shuh shuh kum kine ki lieng ha kane ka pung Umïam kaba itynnad bad shen ka sorkar jylla kan sdang ruh ïa ka Sea Cruise kaban ngïam palat 140-150 ngut ki briew.
Lyngba kane ka lieng Meghalinor la khmih lynti ban long kum ka rynsan na ka bynta ban khring ïa ki nongjngoh kai pyrthei nalor ki jingïakop ïalehkai ha um, kaban pynlong shuh shuh ïa ka Meghalaya kum ka jaka kaba khring ïa ki kamjngohkai pyrthei kiba ïadei bad ka mariang.
