Nongpoh, Jymmang 29: Ka St. Jude’s Secondary School, Umpher ha ka thain Byrnihat ka la hap mad biang ia ka jingsyrtok bad ka jingeh kaba khraw ban pynlong skul, ha kaba mynta ka sngi ruh katei ka skul ka la shah ktah jur na ka jingshlei um bad ki la hap ban ai shuti biang ia ki khynnah hadien ba ka jingshlei um ka la rung shaduh ki kamra klas bad ki phyllaw jong katei ka skul.
Dang ar sngi mynta, u MLA ka Jirang u Bah Sosthenes Sohtun, u Deputy Commissioner ka Ri Bhoi, u Abhilash Baranwal lem bad ki nongmihkhmat na ka NHAI bad na ka tnad PWD ki la leit ban jurip hadien ka jingshah ktah katei ka skul na ka jingshlei um, hynrei mynta ka sngi kane ka skul ka la hap mad biang ia ka jingshlei um kaba ktah hadien ka jingjur slap kaba la sdang naduh ka por 6 baje mysntep.
La ioh ban ia kren bad u Principal katei ka St. Jude Secondary School, u Brother Nicholas Rimai, u la pynpaw ba kane ka jingshlei um ha katei ka skul, ka la ktah shisha ia ki khynnah skul bad ki bor pyniaid skul, namar tang shu wan u lapbah ki la hap ban mad ia ka jingshlei ha kaba haduh ba ki hap ban ai shuti ia ki khynnah ba ka um ka la rung sha ki Kamra Klas bad sha ka phyllaw katei ka skul.
U la ong ruh ka daw hi ka dei na ka jingtih khyndew na ka thain Killing ha kaba tang shu slap ka um ka kit ia ki khyndew lyngba ka wah kaba don hajan katei ka skul bad namar ba set ka lynti iaid ka um, ka um ka la wan rung sha katei ka skul ha kaba kim lah ruh ban set ia ka um. Halor kane u la iathuh ba ki la phah da ka shithi sha u Deputy Commissioner mynta ka sngi ba un shim khia lem halor kane ka jingeh kane ka skul.
