Ka Harijan Panchayat Committee (HPC) ha ryngkat ki nongialam ka Shiromani Gurdwara Parbandhak Committee (SGPC) naka Jylla Punjab hynne ka sngi kila shong jingialang bad u Chief Secretary (CS) ka Jylla ban iathir halor ka jingthmu ban kynriah iaki briew na Them Iew Mawlong.
Haba kren sha ki lad pathai khubor u Nongtreimon sngewbha ka SGPC na Punjab u Jagmohan Singh u la ong ba ka jingiakynduh ia u Chief Secretary kadei ban iakren halor ki jingsngewkhia jaidbynriew Sikhs kiba sah ha Them Iew Mawlong.
“Ka jingialang ka long kum shi bynta jong ka jingiakren kaba dang iaid shakhmat ban kynriah iaki ba sah ba Them Iew Mawlong, ngi la pynpaw ia ki jingmut jong ngi, ka dang long kaba dang kloi palat ban batai halor ka jingialang” la ong u Jagmohan.
U Jagmohan u la kubur baka jingialang bad u CS ka long kaba sei soh bad ka SGPC bad ka HPC ki kyrmen ba shen yn lah ban weng noh iaki jingeh jong ki nong shong shnong na Them Iew Mawlong.
Haba kylli u Jagmohan u la ong “Ka pynsngewkhia ia ngi namar ki jaidbynriew Sikh ki la wan 200 snem mynshuwa na Punjab, ka shnong jong ki ka dei ka Jylla Punjab, ki bahaiing hasem bad ki jaka jong ki ki don ha Punjab, kumta lada don kino kino ki Sikh ha kano kano ka jaka ha ka pyrthei kiba sngewsih ne shem jingeh, nhi ruh ngi sngew sih namar kata ngi wan shane ban pynpaw ia ka jingiatylli bad ki” u la ong.
U Jagmohan u la pynksan baka jingwan jong ka SGPC kam dei ban thaw jingkulmar ne wanrah kano kano ka jingsnewthuh bakla hynrei kadei tang ban ai mynsiem iaka HPC haka jingiakren bad ka Sorkar Jylla haba iadei bad ka jingkynriah iaki na Them Iew Mawlong sha kawei pat ka jaka.
