Ka Khasi Student Union (KSU) hynne ka sngi kala kynduh ia u Lat ka Jylla u CH Vijayashankar ban phah tuklar haba iadei bad ki 6 tylli ki mat jingdawa jong ka Meghalaya kiba dang sahteng haduh kine ki sngi.
Kine ki mat ki kynthup ban pyntreikam iaka Bengal Eastern Frontier Regulation (BEFR) 1873 lane ka Inner Line Permit (ILP) hapoh Meghalaya, weng noh iaka jingpyntreikam iaka Amendment jong ka Citizenship Act 2019, ka Indo-Nepal Friendship Treaty 1950, ban pynbeit ia u pud u sam hapdeng Meghalaya-Assam, ban pynrung iaka ktien Khasi haka khyrnit ba phra bad ban thaw da ka Central Agricultural University (CAU).
Ka seng kala pynpaw baka jingpyntreikam iaka BEFR 1873 lane ka ILP kan iarap ban tehlakam iaka jingwan buhai shnong ki bar Jylla hapoh ka jylla Meghalaya.
Ka KSU ka pynpaw ba jan baroh ki Jylla hapoh ka thain shathei lammihngi (North East) ki don iaki ain ban tehlakam iaka jingwan buhai shnong ki bar Jylla khnang ban pynneh iaka jinglong tynrai bad ka jingbun paid ki riewlum hala ki Jylla.
Ka KSU ka pyntip sha u Lat ka Jylla ba ka jingdawa ban pyntreikam iaka ILP ka lah dei naduh u snem 1985 bad ka iingdorbar thawain jong ka Meghalaya kala mynjur ruh daka Resolution haka 19 tarik Nohphrah 2019 hynrei haduh mynta ka Sorkar Pdeng kam shym la jubab halor kane ka jingdawa.
“Namar kane ngi kyntu ia phi ban shimkhia ia kane daka ba iakren bad ka Sorkar Pdeng ban pyntreikam mar dor iaka ILP hapoh ka jylla Meghalaya” la ong ka KSU.
Ka KSU kala pynsngew ruh ha u Lat ka Jylla, ba dei ban weng noh iaka jingpyntreikam iaka Amendment jong ka Citizenship Act 2019.
Ka KSU kala kyrpad ruh ia u Lat ka Jylla ban iakren lem bad ka Sorkar Pdeng ban pyllait noh ia ka Meghalaya na ka jingtreikam jong ka Indo-Nepal Friendship Treaty, 1950.
“Kumba long ka CAA, ka India-Nepal Friendship Treaty 1950, kaba ailad ia ki nong Nepal ban ioh long nongshong shnong ka India khlem kino kino ki kyndon, kala ktah jur hangne ha Jylla Meghalaya. Naduh u snem 1980, ka Meghalaya kala sakhi ia ka jingnang heh paid ki paid Nepali hapoh ka Jylla, kaba buh ha ka jingma ia ki riewlum rit paid jong ka Jylla, kaba lam sha ki jingiakynad hapdeng ki ar kynhun. Ki paid Nepali kila pynkha ruh ia ki jingeh ha ki jaka khappud ka Meghalaya ban tynjuh bor ia ki riewlum trai jylla halor ka hok ia ki jaka ki puta hapog ka jylla” la ong ka KSU.
Haba iadei bad u pud u sam, ka KSU ka kyntu ia u Lat ka Jylla ban iakren bad ka Sorkar Pdeng ban pynthikna ba ki jaka iakajia kiba hap hapoh u pud u sam jong ki Hima Khasi, dei ban kynthup lang noh hapoh u pud u sam ka Meghalaya.
Halor ka ktien ka thylliej, ka KSU ka la ong ba ka jingkyrpad ban kynthup noh ia ka ktien Khasi ha ka khyrnit ba phra jong ka Riti Synshar ka dei ka jingdawa kaba shonghok, kaba la ia kren hakhmat ka Sorkar India naduh u snem 1960 da ka Khasi Author Society.
Ha kajuh ka por, ka KSU kala kyrpad ia u Lat ban kren bad pynthikna ba ki jingkular bad ki jingtyrwa ban wanrah ia ka Central Agricultural University ha Meghalaya ki dei ban urlong khnang ban ioh jingmyntoi ki samla pule ka jylla.
