Shillong, Jylliew 03: Ha ka jingtohkit kaba jur jong ki pulit ka jylla halor ka jingïap jong u Raja Raghuvanshi, ki pulit ki la pyntikna ba u Raja u la shah pynïap da kawei ka wait kaba dang thymmai, ha kaba ïa kane ka wait la iohtam kaba la pyndonkam ban pynïap ïa u Raja.
Na ka liang u Superintendent of Police ka East Khasi Hills District, u Bah Vivek Syiem u la ïathuh ïa kane ha ka jingïakren bad ki Nongthoh Khubor mynta ka sngi, da kaba pyntikna ba u Raja u la shah pynïap bad ki pulit ki la register mukotduma ban tohkit halor kane ka jingshah pynïap jong u Raja bad ruh ïa ka daw.
U la ïathuh ruh, ba ïa ka jingtohkit kaba bniah yn shimti da ka ba Special Investigation Team (SIT) ba lam khmat da u SP (City) Herbert Kharkongor kiba la sdang ban pynlong ïa ka jingtohkit ha ryngkat ka kynhun ba la donlang ruh da ki saw ngut ki Deputy Superintendents of Police (DSPs) bad ar ngut ki sub-inspector.
U Bah Syiem, u la pyntip ruh, ba ki pulit ki dang ap sa ïa ka kaiphod jong ka postmortem ban tip la u Raja u la ïap shwa ne u la ïap hadien ba la bret ïa u sha riat bad na kane ka kaiphod yn lah ban tip ruh ïa ki jingmynsaw.
Na ka liang ka kynhun ki pulit ki dang lum ïa ki sakhi satar kiba biang ban poi tad shaduh kaba kut jong kane ka jingtohkit, ban tip la kane ka dei ka jingshah pynïap namar ka jingthmu lute, ne pynïap dusmon ne don kano kano ka daw hapdeng kito kiba donkti pyrshah ïa u ba la khlad (Raja).
Shuh shuh ruh, na ka liang ki pulit kin dang bteng ban wad pat sa ïa ka kurim jong u Raja la Sonam, sha ki jaka ba marjan da kaba khmieh ïa ka jingjngai kaba 1-2 kilometres na ka jaka ba la lap ïa ka metïap jong u Raja.
