Shillong Jylliew 02: Ki nongïalam jong ka A-CHIK Conscious Holistically Integrated Krima mynta ka sngi ki la leit ban ïa kynduh markhmat bad u Lat ka Jylla u CH Vijayashankar bad aiti da ka dorkhas na bynta ki 6 tylli ki mat jingdawa na bynta ka jingbit jingbiang jong ki nongshong ha Garo Hills.
Ha kane ka jingleit ïakynduh ïa u Lat ka Jylla, la lamkhmat da u General Secretary ka ACHIK u Adam R Sangma lem bad kiwei kiwei ki dkhot.
Na ka liang u Adam R Sangma, u la pyntip ba ka mat kaba hakhmat eh ba la rah lyngba ka dorkhas ka long ban pynsngew ha u Lat ïa ka jingdonkam ban pynurlong noh ïa ka mat jingdawa ban pynlong ïa ka Tura kum ka Nongbah Tlang ne Winter Capital, ka jingdonkam ban pyntreikam noh da ka ILP ban ïada na ka jingrung tuh ki mynder ri, ka jingdonkam ban kyntiew kyndan ïa ka Dadenggre sha ka District ba pura.
U la ïathuh ruh, ba nalor kane la buh jingdawa ruh ban pynsted ïa ka jingpynheh ïa ka Baljek Airport, ban pynmang pisa ruh na bynta ka jingtei ïa ka Captain Williamson Sangma State University, ban ithuh noh ïa ka Garo Customary Law bad ban don noh ïa ka Electoral Roll la ka jong na ka bynta ka GHADC.
“Naduh ki mei kpa tymmen jong ngi ki la don lypa ïa ka jingthrang bad jingangnud ba ka Tura kan long kum kata ka Nongbah Tlang, ka Shillong kum ka Summer Capital, ban ioh ïa ka jingïada ïa la ka riti ka dustur bad ka kolshor”, ong u Adam, da kaba bynrap ba ki paid ka riewlum Garo ki angnud shisha ban urlong noh kane ka mat namar kan pynsuk ïa ki ha baroh ki liang khamtam na ka jingjngai ka sor Shillong haba ki donkam ïa ki tnad office sorkar bapher bapher.
U la ong ruh, ba kum ka kynhun ka angnud ruh ba ka sorkar jylla kan wanrah ïa ki office sorkar kiba donkam ha Tura kum ka iingbishar kaba pura ha Tura na bynta ka jingmyntoi jong ki paidbah Garo nalor kiwei kiwei.
