Shillong, Jylliew 03: Ki bahaiing jong u (L) Raja Raghuvanshi, ki la kyrpad ïa ki bor ka sorkar Meghalaya ban pynsted ïa ka jingtohkit bad ban aiti noh ïa ka jingtohkit sha ki bor ka Central Bureau Investigation (CBI) na bynta ka jingtohkit halor ka jingïap jong u Raja ïa kaba la lap ïa ka met jong u na kawei ka riat kaba don ha Wei Sawdong, Sohra.
Lah ban kdew, ba da jingbteng bad jingtreishitom ban wad ïa kine ki shikurim kiba la jah naduh ka 23 tarik Jymmang ha ka thaiñ Sohra, ki pulit ki la lap nyngkong ïa ka metïap jong u Raja na ka riat kaba don ha Wei Sawdong, Sohra haka 2 tarik Jylliew bad la rah ban leh postmortem ha NEIGHRIMS hospital, Shillong ban ioh ïa ka kaiphod kaba shai.
Ha ka jingïakren bad ki Nongthoh Khubor, u Vipin Raghuvanshi, u hymmen jong u Raja, u la pynpaw ba ki bahaiing ki dap da ka jingsngewsih kaba khraw ban duh noh ïa la u para khlem dei por, ha kaba wat hapdeng ka jingthmu wankai pyngngad jong ki shikurim kiba dang dep ïathoh shen ki la mad pynban ïa kane ka jingjia kaba sngewsih bad kaba sngew shyrkhei.
U Vipin, u la ïathuh ruh, ba ki bahaiing hi ki la suba jur ba kane ka jingïap jong u Raja ka lah ban dei ka jingshah pynïap bad shah lute, namar na ka met jong u Raja la lap tang ïa ka smart watch ne ka baje, hynrei ki jingdeng ba remdor kum ka sati bad kynjri Ksiar ki la jah lem bad ki mobile remdor, kumta ban lap ïa ka jingshisha baroh halor ka jingïap jong u Raja la i donkam ba ki bor ka CBI kan shimti ïa ka jingtohkit.
Haba kylli la ki bahaiing ki hun ne em ïa ka jingtreishitom bad len lade ki pulit ka Meghalaya ban wad ïa ki shikurim kiba la jah, u Vipin u la ong, “Ngi hun bad ngi pdiang ïa ka jingtreishitom jong ki pulit, ki bor ka ain bad kiwei kiwei kiba la don bynta ban wad ïa kine ki shikurim, hynrei haba ïa dei bad ka jingtohkit halor kane ka jingjia, ngi kwah ba ki bor ka CBI kan shimti ban lap kham kloi ïa ka daw bad lada dei ba u Raja u shah pynïap dei ban thwet mardor ïa kiba donkti”, u la bynrap, da kaba ong ba ngi kyrmen skhem ban lap noh kloi sa ka Sonam ka kurim u Raja kiba la jah lang naduh ka 23 tarik Jymmang bad ngi kyrmen ruh ba ka dang im.
U la ïathuh ruh, watla ki bahaiing ki la tip ïa kane ka jingjia pyrshah ïa u para jong u, hynrei haduh mynta kim pat nud pat ban ïathuh ïa la ki kmie ki kpa bad kin sa pyntip da la ïohrah ïa ka met jong u sha ka shnong jong ki, kata hadien ba la pyndep ïa ka postmortem bad ki jingdonkam baroh.
