Shillong, Jylliew 03: Ka Khasi Hills Autonomous District Council (KHADC) hynne ka sngi kala beh kam 13 ngut ki nongtrei Casual bad kala pynhiar kyrdan iaki 30 ngut ki nongtrei ba pura (Permanent) shaka kam Casual.
Kine ki Nongtrei kiba la shah bem kam bad shah pynhiar kyrdan ki kynthup ia ki nongtrei na ka tnad Enforcement, ka tnad Forest, Professional Tax bad kiwei kiwei.
Hashuwa kane, ki nongtrei ka KHADC kiba don kumba 27 ngut eiei kila leit pan jingpynshai na u CEM ka District Council u Bah Shemborlang Rynjah halor ka jingshah behkam bad shah pynhiar kyrdan.
Haba kren shaki lad pathai khubor u Bah Khrawbor Mawlong, uwei na kiba la shah ktah ha ka rai ka KHADC, u la ong ba ka jingwan kynduh ia u CEM kadei ban iakren sani bha halor ka jingshah behkam bad shah pynhiar kyrdan.
“Ngi la kyrpad ia u CEM bad ngi la iathuh ia ki jingeh jong ngi, ki jingeh ban pynbit pynbiang ia ka iing ka sem, ki ram kiba ngi shim na ki Bank bala ai NoC da ka Ophis hynrei ka jubab na u CEM ka long beit ba ym don lynti shuh ia ngi” la ong u Bah Khrawbor.
U la ong ba naka liang u CEM u la pyntip ba ka jingbehkam bad ka jingpynhiar kyrdan iaki, ka dei katkum ka rai jong ka Executive Committee (EC) ka KHADC.
U Bah Khrawbor u la iathuh ba ki nongtrei Casual kila shah pynkiew kyrdan (Regularised) ha u bnai Nailar 2024.
U la kam ba naka liang ka KHADC ka khlem ai ia kano kano ka daw ban behkam ne pynhiar kyrdan iaki nongtrei. “Ki khlem ai ki daw hynrei ka jingbehkam ka long bei kynsan kynsan” u la ong.
