Nongpoh, Naitung 21: U MLA ka Nongpoh u Bah Mayral Born Syiem mynta ka sngi u la leit ban jurip ïaka madan Artificial Turf haka shnong Umbuda kaba dang pyntrei shaid shaid bad kaba dei ruh kawei naki madan kaba ki khun samla kila ap khmih lynti dik dik ban pyndep noh ïaka naka bynta ban ioh kilan.
Ha kane ka jingjurip haka jingdonlang ki nongïalam shnong ka Umbuda bad Mawroh bad kumjuh ruh ki Sports Club na kitei ki 2 tylli ki shnong, naka liang u MLA u la pynpaw ka jingsngewhun halor ka jingpyntrei ïa katei ka madan bad ka jingïaid shaid shaid jong ka kam bad khmih lynti ba shen yn sa lah ban plie paidbah noh ïa katei ka madan ïalehkai kaba la shna haka rukom kaba janai naka bynta ka jingmyntoi ki khun samla namar kumba long haduh mynta ka kam kala ïaid kumba 65-70% ka jingpyntrei.
Kum ban shu pynpaw ba ïa katei ka madan la wan ban buh maw nongrim da u Myntri Rangbah ka jylla ha u bnai Lber 2024 ryngkat ka jingmang pisa kumba 10.93 klur lyngba ka tnad ïalehkai ka jylla.
Haba kren sha ki lad pathai khubor hadien ka jingjurip naka liang u Bah Mayral Born Syiem u la ong ba katei ka madan kadei kaba ki khun samla kila ap khmih lynti ban pyndep noh ïaka ban ioh ïalehkai namar kumba long mynta ki madan ïalehkai kiba biang ki duna bha, bad haka jingleit jurip jong u la lap ba bun naki kam kila jan dep bad sngewhun ka rukom pyntrei bad khmih lynti ba ïakatei ka madan yn lah ban pyndep haka por kaba biang wat hapdeng shibun ki jingeh.
Naka liang u Bah CB Syiem Rangbah Shnong ka Umbuda u la pynpaw ba naka liang ka shnong kaba la ai sngewbha ruh ïa katei ka jaka ka jingsngewnguh bad ai ka jingkhublei halor ka jingshimkhia jong u MLA ban jurip ïa katei ka madan kaba long ruh kum ka jingbuddien ïaka jingïaid jong ka kam ban pynthikna ba ki kam ki ïaid shaid shaid bad ban pyndep haka por ba biang.
