Shillong, Jylliew 12: Kum ka jingai mynsiem bad ka jingai burom na ka bynta kito ki kynhun kiba la ïa trei shitom halor ka jingjia ha Sohra, ka Tnat Jngohkai Pyrthei ka jylla ha ka 11 tarik u Jylliew 2025 ka la pynkup burom ïa ki 36 ngut ki dkhot na ki kynhun bapher bapher, 42 ngut ki Pulit na ka State Disaster Response Force bad 11 ngut na ka tnat Pulit jong ka Sohra Police Station.
Kane ka jingpynkup burom ka tnad jngohkai pyrthei ïa kitei ki kynhun, ka dei halor ka jingdon bynta bad ka jingtrei shitom ha kaba wad ïa u Raja Raghuvanshi ba la lap noh ïa ka met jong u bad ruh ïa ka Sonam Raghuvanshi kaba dei ka kurm jong u, ba la kem noh da ki Pulit halor ka jingkynnoh don kti ban pynïap ïa u kurim jong ka u Raja Raghuvanshi ha ka thain Sohra.
Kine ki kynhun ba la shah pynkup burom ki kynthup ïa ki 36 ngut ki dkhot ki kynhun bapher bapher kiba kynthup ïa ki lai ngut ki dkhot ka Tour Guides Association of Meghalaya, Central Body, 6 ngut ki dkhot ka Tour Guides Association of Meghalaya, Sohra Unit, 9 ngut ki local Guide, 8 ngut ki dkhot ka West Jaintia Hills District Adventure Sports And Mountaineering Club bad 10 ngut ki dkhot ka Sohra Taxi Owners Association ba nalor ka jingshah pynkup burom ki la ioh pdiang ruh ïa ka khusnam pisa kaba mar T 15 hajar marwei.
U Myntri sorkar ba dei peit ïa ka tnad ki kam jngohkai pyrthei, u Bah Paul Lyngdoh u la shim bynta kum u kongsan ban pynkup burom ïa kitei ki kynhun bad la sakhi lang ruh da ka jingdon lang u MLA ka Sohra Constituency u Bah Gavin Mylliem, u MDC ka Sohra u Bah Titostarwell Chyne, u Director ka Tourism u Bah Cyril V.D Diengdoh bad u SDO ka Sohra Civil Sub-division u Bah M. Challam lem bad kiwei de.
