Mairang, Rymphang 17: Ha ka rally ne ka jingiaiaid paidbah kaba la pynlong da ka Dorbar Shnong Nongthymmai, kata ban pynpaw ia ka jingpyrshah kaba jur halor ka jingshah pyniap u Kerang Sawkmie 25 snem, ha kaba lyngba katei ka jingiaiaid paidbah, la mih ka sur ban pynshitom da kaba set patok shi jingim ia ki 3 ngut kiba la shah kem, halor jingsuba ba ki la donkti ha ka ban pyniap ia u Kerang Sawkmie.
Katei ka jingiaid Rally ba mynta ka sngi, ka la sdang na Madan Nongsiej ka shnong Nongthymmai bad kaba la iaid ter ter sha Mawpdah, Madan Maroid bad pynkut biang ha Madan Nongsiej, ha kaba lyngba katei ka Rally la wan ban iashimbynta da ki spah ngut ki paidbah, kaba kynthup naduh ki nongialam shnong, ki longkmie ki longkpa, ki khynah skul lem bad kiwei.
Hadien ba la kut ka jingiaid Rally, la pynlong pat ia ka jingialang ba lyngkot ha Madan Nongsiej, ha kaba la sakhi ia ka jingiadonlang ki nongialam ka ka Synjuk 12 Shnong Area Maroid, ki nongialam ka VDP Nongthymmai,ki seng longkmie, ki nongialam ka KSU Nongkhlaw, u Sordar shnong Nongthymmai lem bad kiwei.
Kum ban shu kdew hangne, ba u Kerang Sawkmie 25 snem ka rta na ka shnong Nongthymmai, u la jah na la iing ha ka naduh ka 6 tarik mynta u bnai bad u khlem wanphai shuh sha iing, kaba la pynlong ia kiba hailing ba u ujor ejahar sha ki Pulit bad halor katei ka jingjia, ki Pulit ki la kem noh ia ki 3 ngut kiba suba don kti ban pyniap ia u Kerang Sawkmie.
