Shillong, Jylliew 03: U CEM ka KHADC u Bah Shemborlang Rynjah u la ong ba ka jingbehkam iaki 11 ngut ki nongtrei bad ka jingpynhiar kyrdan na ka jinglong Nongtrei (Permanent) ba pura sha ki Nongtrei Casual kadei hadien bala bishar bniah bha daka Executive Committee.
Haba kren shaki lad pathai khubor, u CEM Bah Shemborlang Rynjah, u la iathuh ba ka KHADC kala thaw iaka Committee on Administrative Streamlining ban pynbeit ryntih iaka rukom thungkam thungjam hapoh ka District Council.
U Bah Shemborlang u la iathuh baka Committee on Administrative Streamlining kala shong jingialang haduh san sien ban iathir halor ka Service Rules jong ka KHADC.
“Haki jingialang, kala mih ka mat iatai halor ka jingthungkam iaki 43 ngut ki nongtrei hapoh ka KHADC haka ba 13 ngut kidei kiba dang shu shah thungkam (Fresh) bad 30 ngut kidei kiba la shah pynkiew kyrdan (Regularised) naka Casual” la ong u CEM.
“Hadien ka jingbishar bniah ngi la lap ba iaki 43 ngut la thungkam khlem kano kano ka jingmang tyngka ban siew tulop iaki” u la ong.
U CEM u la iathuh ba naka liang ka Committee on Administrative Streamlining kala ai jingmut shaka EC bad naka liang ka EC kala shong bad la rai ban behkam iaki 13 kiba dang shu shah thungkam (Fresh) bad iaki 30 ngut kiba la shah pynkiew kyrdan (Regularised) naka Casual ngi la rai ban pynhiar kyrdan iaki sha ka kyrdan Casual.
