Hadien 12 snem, kata hadien ba ka Spain ka la jop ia ka Euro Cup 2012, ka Spain ka la ioh biang ban rah ia ka nam lahduh ia kane ka Euro Cup 2024, hadien ba ka la lah ban pynliem noh ia ka England da 2-1.
Ha ka jingiakhun phainal hapdeng ka Spain pyrshah ia ka England, da shisha u sawar jong ka jingjop u kham noh sha ka Spain, namar ha ka jingialehkai, ki rangialehkai ka Spain, ki la lah ban ialehkai kham bha bad kiba la pynkulmar hi thlim ia ki rangialehkai ka England bad khamtam ia ki rangapdien.
Ka jingiakhun ha ka kylla step, ka la kut ha ka jingiakhaid kaba ym don kiba thep kol, watla ka Spain ka la nion tyngeh ia ka England. Haba la bteng ka kylla miet jong ka jingiakhun, ka Spain ka la ioh ban pynkhihjar da u Nico Williams ha ka minit ba 47, lyngba ka bol kaba la pynbuh bha da u Lamine Yamal.
Katba ka jingiakhun jong ka kylla miet ka dang iaid shakhmat, ka England ruh ka la ialeh tyngeh ban ioh pynphai ia katei ka kol ba ka la shah thep bad ha ka jingiakhun, ha ka minit ba 73 ka England ka la ioh ban pynphai lyngba u C. Palmer. Hynrei tang katto katne minit hadien katei ka kol ba la pyniakhaid da ka England, ka Spain ka la ioh ban thep biang sa shikol lyngba u M. Oyarzabal, uba la thep ha ka minit ba 86 bad kaba la pynthikna syndon ia ka Spain ba kan long kum ka lahduh ha ka Euro Cup 2024.
Ki khusnam shimet kiba la ioh da ki rangialehkai, ia ka nam kum u rangialehkai ba tbit tam la ioh da u Rodri, u rangialehkai pdeng ka Spain bad uba lehkai na ka Manchester City, ia ka nam kum u rangthep kol ba bun tam, la ioh da u Harry Kane ka England, uba la thep 3 kol watla ki la don sa san ngut kiwei pat ki rangialehkai kiba la ioh ban thep mar 3 kol ha katei ka lympung, katba ia ka nam kum u rangialehkai ba lah ban iarap (Assist) ha ban thep kol, la ioh da u Lamine Yamal, u rangialehkai ba dang 17 snem ka rta na ka Spain.
