Nongpoh, Jylliew 01: Ki ar tylli ki dorbar shnong ba kynthup ia ka Dorbar Shnong Nongdiengngan bad ka Dorbar Shnong Nongmahir mynta ka sngi ki la pynpaw ia ka jingsngewkhia kaba jur ba la hap ban pynsangeh ia ka Project jong Stage 3 ka MeECL ha katei ka thain kaba dei hadien ka jingdon jong kawei ka kynhun seng kiba la wan jurip labour license da kaba bom bad shoh ym tang ia ki nongtrei bar jylla bad ki la ktah kti ruh wat ia ki Khasi ba trei ha katei ka projeck.
Kumba la pynpaw da kitei ki shnong bad ki Nongtrei Khasi ba trei ha katei ka project, la ong ba dang shen la don ki kynhun seng bhalang kiba la wan ban jurip ia ki labour license ia ki bar jylla kiba trei ha katei ka project bad kaba sngewsih ka long ba ha ka jaka ba kin kin kren da ka lynti lane iaid katkum ka lynti, ki la bom la shoh pynban ia ki nongtrei bar jylla bad wat ia ki Khasi ruh kiba trei bylla haduh ba ki la hap ban khang ia katei ka project ba ki nongtrei bar jylla ki la phet noh na katei ka jaka.
Haba ia kren mynta ka sngi bad ki nongialam shnong ka Dorbar Shnong Nongdiengngan bad ka Dorbar Shnong Nongmahir ryngkat kitei ki bar trei bylla, ki la ong ba kane ka jingleh ki seng bhalang ka la pynduhnong iaki, namar ka Company kaba pyntrei ia katei ka Project mynta ka la sangeh ban trei bad bun kiba Khasi ba trei ha katei ka projeck haduh mynta ki la duh ia ka tulop na ka daw ba ki heh company kiba pyntrei ia katei ka project ki la phet noh sha la shnong tang na ka daw ka jingwan ki seng bhalang kiba la shu bom shu shoh naphang khlem da ia kren ne kylli pyrthew.
Na ka liang u Rangbah shnong Nongdiengngan u Bah Dip Pathaw bad u Secretary ka Shnong Nongmahir u Bah J. Thangkhiew, ki la ong ba kim pyrshah ia ka jingwan ki seng bahlang ban khyrna ia ki labour license bad lada ki wan ruh ki dei ban wan da ka lynti da kaba pyntip sha ka bor shnong bad kumba long mynta da ka jingleh jongki, ka la ktah ia ki Khasi kiba ioh bylla ha katei ka project bad ruh ka project la hap ban khang noh ha kaba ka jingktah bording kan ktah ym tang ia katei ka thain bad kan ktah ia ka jylla hi baroh kawei.
Ki la ong ruh ba kim kyrshan ia ki bar jylla ba wan ban trei lada kim don ki kot ki sla bad lada ki seng bhalang ki khot lang ia ka shnong lada lap ia kino kino ki bym don kot don sla dei ban beh noh ia ki bad ban shu wan leh da ka bor kane ka ktah jur ia ki trai shnong kiba ioh bylla ha katei ka project bad ruh ia ka shnong hi baroh kawei ba bun ki la ioh jingmyntoi na ka jingdon kane ka Project.
Shuh shuh, na ka liang kitei ki nongtrei Khasi bad ki Dorbar Shnong kitei ki 2 shnong ruh ki la kyrpad ia ka sorkar bad ruh ia ka tnad MeECL ban sdang biang kane ka project ka stage-3 ka MeECL khnang ba kan nym pynduhkam pynduh jam ia ki trai shnong bad ruh lada lah lei lei ban pyndep ka jingmyntoi kan long ia ki paidbah ka jylla hi baroh kawei ba kin ioh ia ka bording ilektrik ba thikna.
Ha kawei ka bynta ruh ki la kyrpad ia kino kino ki seng bhalang lada ki wan ban khynra ia ki nongtrei bar jylla ba kin pyntip lem ia ka dorbar shnong bad ruh ba ki dei ban leh da ka lynti kaba dei ba nym ktah ia ka project, namar lada ka Company ka sangeh noh ban trei ka jingduhnong ka long ia ki trai shnong kiba ioh kam iohi jam ha katei ka thain.
Sa peit ruh
