Ka kynhun jong ki liang pyrshah ka jylla hapoh ka jinglamkhmat jong ka seng Congress kaba la tip kum ka United Opposition Forum, hynnin ka sngi la ujor da ka ejahar ha Dispur Police Station pyrshah ia u Myntri Rangbah ka jylla Assam, u Himanta Biswa Sarma.
Katei ka jingujor ejahar da ka liang pyrshah kadei halor ka jingkynnoh ba u Himanta Biswa Sarma, u la pyrshang ban wanrah ia ka jingsngewpher jaidbynriew lyngba ka niam bad kynhun jaidbynriew.
U President jong ka Assam Pradesh Congress Committee, u Bhupen kumar Borah u la iathuh ba ki don 18 tylli ki seng sain hima sima ha ka liang pyrshah kiba la ujor ia katei ka ejahar pyrshah ia u Himanta Biswa Sarma uba la pyrshang ban wanrah jingiaumsnam bad jingsngewpher jaidbynriew naduh ka 4 tarik jong u bnai Jymmang.
Halor katei ka jingkynnoh pyrshah ia u Himanta Biswa Sarma, utei u nongialam ka seng Congress ka jylla Assam, u la buh ruh ka jingkyntu ia ka President jong ka ri, ka Droupadi Murmu ba kan pynduh noh ia ka jinglong Myntri Rangbah jong ka jylla Assam.
