Shillong, Jylliew 02: Ki Contractor ka rilum Khasi-Jaintia ha ka lama ka Khasi-Jaintia Government Contractors and Suppliers Association mynta ka sngi ki la leit syndon ban kynduh ia u Myntri Rangbah duh ka jylla u Conrad K. Sangma na ka bynta ban ia kren halor ka jingeh ba ia kynduh ki Contractor kaba dei na ka jingslem ban pynlait ia ka Bill kaba ki la dep ban trei ia ki kam contract ha ka jylla.
Ha ka jingialam u President u Bah Welcome Langi lem bad ki dkhot mynta ka sngi ki la ioh lad ban ia kynduh ia u Myntri rangbah ka jylla bad ym tang ba ki la ia kren ia ki jingeh jongki hakhmat u Myntri rangbah, hynrei ki la aiti ruh da ka dorkhas halor bun ki mat jingdawa kiba dei na ka bynta ka jingbit jingbiang lang ki Contractor ha ka jylla.
Haba ia kren sha ki lad pathia khubor u President ka Khasi-Jaintia Government Contractors and Suppliers Association u Bah Welcome Langi, u la ong ba ka mat kaba hakhamt eh ba ki la ia kren ka dei ban pynlait noh ia ka Bill jong ka skhim JJM kaba la sahkut la bun snem mynta bad kane ka la wah rah jingeh ia ki Contractor ka jylla.
U la ong ruh na ka liang ka Association ka la kren ruh halor kiwei kiwei ki jingeh ki Contractor khamtam ka jingslem ban pynlait pisa, ha kaba u Myntri rangbah u la kular ban shim khia bad ban iashong halor kane ka phang ha Delhi ryngkat kiwei kiwei ki Myntri rangbah ba ki jylla bapher bapher ka ri bad kyrmen skhem ba kane kan urlong khnang ba kan weng noh ia ka jingeh ki Contractor ha ka jylla.
Sa Peit Ruh
