Shillong, Jylliew 17:
Ki pulit jong ka nongbah Shillong mynta ka sngi ki la ioh ban kem ia ar ngut ki longkmie kiba la tip kyrteng kum ka Tinkhonei Haokip (37) bad ka Mongkim Haokip (53) na New Keithelmanbi, Senapati, jong ka jylla Manipur halor ka jingdonkti ban shalan beain ia u drok Heroin.
Katkum ka kyrwoh ba la phah da u Bah Sylvester Nongtnger, Superintendent of Police jong ka East Khasi Hills, la iathuh ba ki pulit hadien ka jingioh jingtip kaba thikna, ki la pynlong ia ka jingpynapshrip lyngba ka tnad Anti Narcotics Task Force (ANTF), ki la ioh noh ban kem ia kitei ki ar ngut ki longkmie najan jong ka thanad Madanrting kiba la wan lyngba kawei ka kali kamai Tourist.
Ha ka jingtalasi ia ka met ka jongkitei ki ar ngut ki longkmie, ki bor pulit ka thanad Madanrting, ki la ioh ban kurup haduh 454.32 gram u drok Heroin bad na ka liang jong ki pulit ki la pynngat ia baroh ar ngut kitei ki longkmie hapoh ki kyndon ain jong ka Narcotic Drugs and Psychotropic Substances Act, 1985 bad ka jingtohkit ban lap dien shuh shuh ia kiwei de kiba donkti ha kane ka kam beain ka dang iaid shakhmat.
