Tang na ka daw ka jingshoh u khawiang, uwei u rangbah briew, u la nud ban thombor da kaba pom da ka wait ba nep ia ka ka tnga, ka kiaw kurim bad ruh ka para kynsi khlem da don shuh kata ka mynsiem briew ne mynsiem sngewlem, haduh ba ki la mynsaw jur.
Kane ka jingjia ka la jia ha miet jong ka 12 tarik u Naitung, 2024 ha ka por 10.30 mynmiet ha ka Shnong Shaid Shaid Umoid, kaba dei ka shnong kaba don kumba 15 km ka jingjngai na Mawkyrwat ha South West Khasi Hills District.
Une u briew uba la leh ia katei ka kam thombor la tip kyrteng kum u Comingstar Lyngdoh Nonglait (29), ha kaba la kynnoh ba da ka jingshoh u khawiang u la pom da ka wait ba nep ia la ka tnga ba la tip kyrteng kum ka Kong Ribahun Kharwar (23), ka kiaw kurim ka Kong Ridalin Kharwar (43) bad ka para kynsi jong u, ka Kong Wandashisha Kharwar (19) haduh ba kitei ki lai ngut ki la mynsaw.
Ka khubor ba la ioh lum, la iathuh ba kitei ki lai ngut ba la mynsaw jur la pynkit noh mar mar sha Civil Hospital Mawkyrwat ban ioh ia ka jingsumar kaba mardor, hynrei namar ba la jur ka jingmynsaw la pynkit biang ia ki sha Civil Hospital Shillong na ka bynta ban ioh ia ka jingsumar kaba kham paka.
Shuh shuh, la iathuh ruh halor kine ki kam thombor une u rangbah, tang ha ka sngi kaba bud, kiba haïing jong kitei kiba la mynsaw ki la leit ban ujor da ka ejehar pyrshah ia utei u Rangbah ha Mawkyrwat Police Station bad la iathuh ruh ha katei ka sngi hi, utei u rangbah uba la leh ia katei ka kam beaiñ u la wan ban pyndem hi da lade ha Thanad ka Mawkyrwat Police Station, ha kaba ki Pulit ki la kem ia bad ruh ban pynlong ia ka jingtohkit kaba bniah halor kitei ki kam thombor pyrshah ia ka tnga, ka kiaw bad ka para kynsi.
