Ki pulit ka jylla Meghalaya, kiba dang pynlong ia ka jingthwet kaba jur ban iohkem ia kito ki briew ba donkti ha ka kam pyniap dusmon ia ki saw ngut ba la jia ha ka shnong Umpleng East Jaiñtia Hills District, mynta ka sngi ki pulit ki la iohkem biang sa 2 ngut ki briew ba la kynnoh donkti ha kane ka kam pyniap briew.
Ki pulit ka East Jaiñtia ki la kem ia kine ki 2 ngut mynta ka 15 tarik Naitung bad kumba long haduh mynta, ki pulit ki la ioh ban kem kumba 3 ngut kiba la kynnoh donkti ha ka kam pyniap dusmon ia ki 4 ngut ki briew.
Kumban shu kdew kdew, ha ka 7 tarik Jylliew, ki Pulit kila lap ia ki metiap ba la thiah lyngktar jong ki 4 tylli bad ba la teh lang bad ki jingmynsaw kiba jur ryngkat ki dak pom na ki bynta jong ka khlieh ha kawei ka khlaw ha ka shnong Umpleng, East Jaintia Hills.
La ithuh kyrteng ia kine ki briew kiba la shah pyniap dusmon kum u Nazar Kyndait (33 snem) na Dkhiah East bad u Luba Tamang na ka shnong Umpleng East Jaintia Hills Meghalaya, u Ravi Rai (23 snem) na ka shnong Elam, Nepal bad u Rajesh Rai (26 snem) na ka shnong Dharan Sunsari, Koshi Anchal, Nepal.
Namar ka jingnang pynjur ia ka jingtohkit halor kane ka kam pyniap dusmon ia ki 4 ngut ki bar jylla, ki pulit kim shym la pynpaw satia ia ki kyrteng jong kine ki 3 ngut kiba la shah kem haduh mynta mynne na ka bynta ka jingiaid beit iaid ryntih jong ka jingtohkit.
