Nongpoh, Jylliew 25: Ka jingiakhun kaba shongshit bha hapoh ka lympung ialehkai kriket T20 World Cup 2024, ka la nang iaid ha ka thup Super 8 jong ki kynhun bapher bapher bapher ban ioh rung sha ka thup Semi Final, ha kaba ka ri India ka la long ka ri ba nyngkong ban tikna ban rung sha kane ka thup bad ka Ri Afghanistan ruh ka la pyntikna ban rung sha kane ka thup ha ka sien kaba nyngkong eh ha kum kine ki lympung ialehkai kriket kaba heh ha ka pyrthei.
Ka ri India ka la lah ban pynliem noh ia ka ri Australia da 24 run, ha kaba u katen jong ka India, u Rohit Sharma u la pyni ia la ka sap ialehkai kaba itynnad bad kaba skhem bha ha kaba u lah ban kamai haduh 92 run tang ha ki 41 bol. Ka India kan ia khun pyrshah ia ka ri England ha ka jingiakhun kaba nyngkong jong ka Semi Final jong ka T20 World Cup.
Da kane ka jingjop pyrshah ia ka ri Australia, ka India ka la thaw histori ban long kawei na ki kynhun ha ka pyrthei ban khur namjop ba bun tam ha ki lympung ialehkai T20 World Cup. Ka India ka la jop haduh 34 tylli ki jingiakhun ha ka T20 World Cup naduh u snem 2007 bad ban tam ia ka ri Sri Lanka kaba la jop kumba 33 tylli ki jingiakhun.
U kapten ka ri India u Rohit Sharma, u la thaw rekod ruh ban long u kapten ba paw bad ba janai bha jongka T20 da kaba tam ia ka nam u Babar Azam, kapten ka Pakistan, hadien ba u la lah ban kamai haduh 92 run pyrshah ia ka Australia.
Ha kawei pat ka liang, ka ri Afghanistan hadien ba ka la lah ban pynliem ia ka Bangladesh ban rung sha ka thup semi final ha ka sien kaba nyngkong eh ha ka histori lehkai Kriket jong kane ka kynhun kaba dang shu sdang paw shen ha ka histori T20 World Cup ia kane ka kynhun la lamkhmat da u Rashid Khan kum u kapten.
Da ka jingjop ia ka ri Bangladesh, ka Afghanistan kan pynkhreh mynta ban iakhun pyrshah ia ka ri kaba kham satar ha ka lympung ialehkai kriket bad kata ka dei ka ri South Africa.
