Shillong, Jylliew 10: Da ka jingsngewkhia ïa ki samla pule kiba shah ktah na ka jingpynslem ka sorkar ban pynlait ïa ka bai bam ki khynnah pule na ka Chief minister scholarship jong u snem 2025, ka Khasi Student Union Sengkmie ka la pynher syndon da ka dorkhas sha u Myntri Rangbah ka jylla u Conrad K. Sangma ban dawa tuklar mardor na ka bynta ban pynlait noh ïa ka bai bam jong ki samla pule kiba don hok ban ioh ïa katei ka bhah ba la buh da ka sorkar.
Katkum katei ka dorkhas ba la soi da u Samla Alerick Kharjana kum u Education Secretary ka KSU Sengkmie, la pynpaw ba ka seng ka la shim khia mardor halor kane ka mat kaba shah ktah ki samla pule, ka dei hadien ba ka seng ka la ioh pdiang shibun ki jingujor na ki samla pule kiba la pynpaw jingeh halor ka jingpynshlem ban pynlait ïa katei ka bai bam na ka bynta kito ki samla kiba don hok ban ioh pdaing bai bam.
La pynpaw ruh, ba kane ka jingpynslem ban pynlait bai bam lyngba katei ka Chief Minister Scholarship, ka ktah bha khamtam ïa kito ki samla pule kiba wan na ki longing longsem baduk bad kyrduh bad la jin ba ka sorkar kan pynlait kloi kan da long shisha ka jingkyrkhu ïa ki ba kin dang lah ban pyntbit ïa lade ha ka kam pule puthi.
Namarkata, na ka liang ka KSU lyngba katei ka dorkhas ba la pynher sha u Myntri Rangbah ka jylla u Conrad K. Sangma, ka kyrpad jur ïa ka sorkar ban shim khia bad ban pynlait noh ïa ka bai bam kaba la pynsahteng, khnang ba kan nym ktah ïa ka lawei ki samla pule khamtam kito ki samla kiba wan na ki longing longsem kiba duna ha ka ioh ka kot.
Sa peit ruh
