Jowai, Jylliew 20:
Kumba lai ngut shipai Border Security Force (BSF) kiba la khie wahleng ryngkat ka jingsuba shoh khawyiang, hynnin ka miet, kila leit ban rung jubor ia kawei ka longing ha ka shnong Kuliang, East Jaintia Hills District da kaba kynjat bad pynpait dusmon ia ka jingkhang jong katei ka ing. Kane ka jingjia ka la saphriang ruh lyngba ki lad social media kaba la ringdur da ki para marjan.
Katkum ka ejahar kaba la ujor ha Umkiang Police Patrol Post kaba la soi da ka Kong Martina Pohshna, kaba dei ka trai ing, la iathuh ba kitei ki lai ngut ki shipai BSF kiba khlem phong satia ia ki jain shipai (uniform) ki jong ki, ki la wan kynjat bad pynpait dusmon ia ka jingkhang jong ka ing jong bad rung jubor shapoh katba ki dang ia bamja shi ing shi sem.
Ka la iathuh ruh ba katba u long jongka, u Bah Shanroi Lyngdoh Lyngkhoi u dang thet kti, kitei ki shipai BSF ki la rung bad shoh beit kynsan kynsan ia utei u lok u jongka khlem kano kano ka jingpynshit ne ka jingiapynibor. La iathuh ba kitei ki lai ngut ki shipai, ki la la rah da u sdie, u la lathi ban shoh pynmynsaw ia ki, ha kaba na katei ka longkmie lem bad la ka khun ki la pyrshang ban knieh ia utei u sdie ruh kim lah satia namar ka jingkhlain bor jong kitei ki shipai.
La iathuh ba kitei ki shipai, hadien ba ki la phet na katei ka jaka, ki la wan biang ha ka por kumba 12:30 baje jong ka 20 tarik u Jylliew ryngkat bad 15 ngut kiwei pat bad sdang ban shoh biang ia u lok jong katei ka longkmie khlem jingmap satia bad knieh ruh ia ka mobile phone jongka khun ka jongka.
Katei ka longkmie, haka ejahar, ka la kynnoh ruh ba kitei ki shipai BSF ki la tim la tla da ki kyntien khlem-akor, ki la jrong kti bad leh khlem-akor ruh ia ka khun ka jongka na ki bynta jong ka shadem bad ha katei ka por, na ka liang ka jongka, ha ka jingpyrshang ban iarap, ka la shah kynjat pynban.
Shuh shuh, ka la ong ruh ba kitei ki shipai BSF kila byrngem byrsit ruh ban siat ia katei ka longing bad byrngem ia ka khun ka jongka, ba kin sa peit iaka lada ka leit sha Umkiang.
Halor kane ka jingjia, na ka liang ka katei ka longkmie, lyngba ka ejahar, ka la kyntu ia ki bor pulit ba kin register case pyrshah ia kitei ki shipai BSF bad pynshitom katkum ki kyndon ain, da kaba bynrap ruh ba maka lem bad ka khun ka jongka, kila ithuh durkhmat ia kitei ki shipai BSF, lada lap biang markhmat.
