Uwei u Nongniah Scooty mynta ka sngi u Blei, u la mynsaw jur, kaba dei na ka daw kaba u la leit ban tynrah da ka Scooty kaba u niah ia uwei u Rishot Dewbilat ba pynieng harud ka surok ka Umsning By-pass ha Ri Bhoi.
Kane ka jingjia ka la jia mynta ka step sngi u Blei ha ka por 10.40 baje mynstep, ha kaba u Nongniah ka Scooty Yamaha kaba don ia u number ML 05-Z-7656 u la leit ban tynrah ia u Rishot Dewbilat da ka Scooty kat haduh ba katei ka Scooty ka la julor phum.
Une u rangbah ba la mynsaw la tip kyrteng kum u Hilarious Syiem, 44 snem ka rta na ka Shnong Mawiong, East Khasi Hills, ha kaba na ka daw ka jingmynsaw la rah noh mardor ia u sha CHC Umsning ban ioh ia ka jingsumar bad na ka daw ka jingjur ka jingmynsaw la pynkit biang noh ia u sha ki jaka ai jingsumar ha Shillong ban ioh ia ka jingsumar kaba kham paka.
Ka kyrwoh ba la ioh jingtip na ki Pulit ka Ri Bhoi, la ong ba ha ka jingleit tohkit halor katei ka jingjia, la lap ba utei u rangbah u la thiah ha madan bad u don hapdeng ka jingbym tip briew, ba kane ka jingjia ka la jia katba u dang wan iaid lynti na Nongpoh ban kiew sha Shillong bad ha ka jingbakla, u la leit ban tynrah ia utei u rishot dewbilat kaba la pynlong ia u ban mynsaw jur.
Shuh shuh, ka tyllong khubor ba la ioh lum na ki Pulit ka Ri Bhoi, la ong ba ia katei ka Scooty la tan noh sha Umsning Police Outpost bad ka jingtohkit halor kane ka jingjia ka dang iaid shakhmat ban tip ia ka daw tynrai jong kane ka jingjia
Husiar khamtam naka jingjur slap